Foto: rbc.ru

7 qırküyekte mäjilis deputattarı "Merekeler turalı zañğa" özgeris engizip, 1 jeltoqsanda toylanatın Twñğış prezident künin memlekettik mereke tiziminen alıp tastaudı maqwldadı. Bwl turalı Ortalıq Aziya jañalıqtar qızmeti jazdı.

Twñğış prezident küni endi "qoğamdıq joğarı mañızı bar data" boladı. Bwğan qosa, mäjilis 25 qazan Respublika künin qaytarıp, wlttıq mereke statusın berdi. Al 16 jeltoqsan Täuelsizdik küni memlekettik mereke statusına tüsti.

2011 jılı 10 jeltoqsanda parlament "Merekeler turalı" zañğa tolıqtırular engizip, 1 jeltoqsandı Twñğış prezident küni retinde atap ötudi maqwldağan. Deputattar bwl datanı eldiñ sol kezdegi prezidenti Nwrswltan Nazarbaevtıñ "memleket aldındağı eñbegin tanıtu maqsatında" memlekettik mereke dep jariyalağan edi.

Al 1990 jılğı 25 qazanda egemendik deklaraciyası jariyalanğan kün elde 2009 jılğa deyin "Respublika küni" retinde atalıp kelgen edi. Keyin bwl mereke qoğam qarsılığına qaramastan küntizbeden alınğan.

Resmi derek boyınşa 238 adam qaza tapqan Qañtar oqiğasınan soñ eks-prezident Nwrswltan Nazarbaevtıñ bilikke ıqpalı älsirep, qazirgi prezident Qasım-Jomart Toqaevtıñ biligi küşeydi.

Keyingi uaqıtta Nazarbaevqa qatıstı şeşimderdiñ köbin mäjilis deputattarı wsınıp jatır. Mäselen, 5 mamırda mäjilis referendum turalı zañnan Nazarbaevtıñ märtebesine qatıstı bölimdi alıp tastau wsınısımen kelisken edi. Keyin 5 mausımda Konstituciyağa özgerister engizu turalı referendumnan keyin bas zañnan Nazarbaevqa berilgen "Elbası" statusı alındı. Al 2 qırküyekte mäjilistiñ bir top deputatı Nwr-Swltan qalasına "Astana" atauın qaytarudı wsındı.

Mäjiliste otırğan deputattardıñ basım böligi Nazarbaev twsında onıñ sayasatın jappay qoldağan edi.