"Taliban" jetekşileriniñ biri Molda Abdul Ğani Baradar. Foto: N Live,

«Taliban» qwrğan jaña ükimettiñ joğarı jetekşileri arasında janjal boldı. Auğanstannıñ jaña köşbasşıları arasındağı qayşılıq turalı bwğan deyin rastalmağan mälimetter tarağan bolatın, keyinnen onı tälipter resmi mälimdeme arqılı joqqa şığarğan edi. Alayda, jaña ükimettiñ joğarı jetekşileriniñ biri bwl turalı rastap, BBC-ge mälimet bergen.

Janjal «Taliban» wyımın qwruşılardıñ biri jäne bwğan deyin wyımnıñ Katardağı keñesin basqarğan Molda Abdul Ğani Baradar men «Hakkani» soğıskerler tobınıñ jetekşisi bolıp kelgen Halil älRahman Hakkani ortasında bolğan. BBC-diñ puştum tilindegi qızmeti habarlağanday, prezident sarayında bolğan janjalğa Baradar men Hakkani ğana emes, olardıñ janındağı jaqtastarına qatısqan.

Baradar soñğı künderi osı kelispestikke qatıstı aqparat qwraldarı men aşıq kezdesulerge şıqpay qalğanı turalı habarlar tarağan edi. Mälimet közderiniñ habarınşa Baradardıñ jaña ükimet qwramına köñili tolmaydı. Äsirese, Hakkani ortasındağı kelispeuşilik «jeñisti kimniñ atına jazu» mäselesi boyınşa şıqtı degen mälimetter aytıluda.

Baradar men onıñ jaqtastarı jeñistiñ özi sekildi diplomat adamdardıñ eñbeginiñ nätijesinde qolğa keldi dese, tälipter jağında türli qarulı şabuıldardı wyımdastırumen atı şıqqan toptıñ jetekşisi Hakkani jeñisti qarulı küres alıp keldi degen közqaraspen tartısqan.

Baradar AQŞ prezidentimen auızeki söylesken alğaşqı «Taliban» jetekşisi bolğanı belgili. Bıltır ol Donal'd Tramppen telefon arqılı söylesken. Sonday-aq Baradar «Taliban» atınan AQŞ-tıñ äskerin şığaruı boyınşa kelisimderge qol qoyğan. Qazir jaña ükimet qwramındağı prem'er-ministrdiñ üş birdey orınbasarınıñ biri.

Hakkani tobı soñı jıldarı şeteldik äskeri küşterge qarsı şabuıldardı wyımdastırıp keldi. Quattı qarulı top Auğanstandağı barlıq terrorlıq toptardıñ mindetti türde sanasatın qarulı küş retinde belgili bolğan. Bwl toptı Qwrama Ştattar terrorlıq wyım retinde tanidı. Onıñ jetekşisi Sirajuddin Hakkani qazir işki ister ministriniñ qızmetin atqarıp twr.

Baradar  Hakkanimen bolğan janjaldan keyin birneşe kün aşıq közge tüspey qalğanda keybir aqparat qwraldarı onı Hakkani tobı jağınan öltirilgen boluı da mümkin degen boljamda aytqan. Bwl tartıs onşa auqımdı körinbegenimen, aldağı uaqıttağı tälipterdiñ Auğanstandağı biliginiñ negizigi problemalarınıñ birin ayqındap twr.

The Qazaq Times