Foto: newsroom.kz

Jaqında Resey ükimeti otstavkağa ketti, köp wzamay körşi Özbek elinde de osınday jağday orın aldı. Onıñ aldında Ukraina ükimeti de otstavkağa ketken bolatın. Bwl qwbılıs bizge de kele jatqan sıñaylı. Öytkeni soñğı jıldarı Ükimettiñ keñeytilgen orısı aldında otstavka jaylı alıp-qaşpa äñgimeler bizde de taray bastadı. Memleket basşısı merziminen bwrın saylau ötpeydi dep qadap aytqanımen Ükimet otstavkağa ketedi degen äñgime tarauın qoymay jatır.
Elimizde «Qazaqstan – 2050» strategiyası, 5 reforma, Industriyalıq-innovaciyalıq damudıñ memlekettik bağdarlaması sındı köptegen josparlı bağdarlamalar bar. Olardı orındau üşin talapşıl äri aytqanın istete alatın adam kerek.
2019 jılı Industriyalıq-innovaciyalıq damudıñ memlekettik bağdarlamasınıñ ekinşi besjıldığı ayaqtaldı. TENGENOMIKA telegram-kanalınıñ jazuınşa, bwl bağdarlama boyınşa közdelgen 4 maqsattı indikatordıñ tek 2-ne ğana qol jetkizilgen. 2015-2019 jıldar aralığında öñdeu käsiporındarınıñ eksportı tek 8,2% ğana ösken, negizgi meje 19% bolu kerek edi. Al eñbek önimdiligi 4,2% qwrağan, jospar boyınşa ol 22% kerek edi. Qarap otırsaq bwl bağdarlamanıñ nätijesi köñil könşiterlik emes. Bügingi prem'er ministr Asqar Mamin ükimet basına keyin kelgenin eskersek ol ayaqtalıp jatqan IIDMB-2 bağdarlamasınıñ tiimdi jwmıs isteuine mümkinşiligi de bolmağanın añğaramız. Onımen äsirese eks-prem'er ministr Baqıtjan Sağıntaev pen onıñ ministrleri aynalısqan.
Jaqında qazirgi ministrler kabinetimen 2020-2025 jıldarğa rnalğan IIDMB-3 bağdarlaması qabıldandı. Bwl bağdarlamanıñ aldıñğı industriyalıq bağdarlama nwsqalarına qarağanda maqsatı da, qwraldarı da özgeşe. Mine, osı bağdarlamanı iske asıru nätijesi qazirgi Ükimettiñ qanşalıqtı tiimdi jwmıs istegenin ayqındap beretin boladı. Alayda ol üşin Asqar Mamin basqaratın ükimettiñ joq degende äli 2-3 jıl merzimde jwmıs isteuin talap etedi.
Mwnday ülken bağdarlamalardıñ tıñğılıqtı iske asırıluı üşin temir tärtip ornata alatın äri talapşıl ükimet basşısı kerek. Sondıqtan däl qazir QR Ükimetiniñ otstavkağa ketui naqtı bir isti ayaqtamay, jartı joldan ketumen teñ. Ol elimizdiñ ekonomikalıq damuı jäne tağı basqa körsetkişterge keri äserin tigizetini anıq. Sondıqtan körşi elderde bolıp jatqan qwbılısqa tañırqay bermey, alğa nıq qadam basıp, qazirgi Ükimettiñ alañsız jwmıs isteuine jağday jasağınımız orındı boladı.

"The Qazaq Times"