Foto: QT

Bügin Qazaqstannıñ birqatar qalalarında miting ötedi degen küni policiya belsendilerdi küşpen wstap jatır.

Oqiğa ornında jürgen tilşilerimizdiñ habarlauınşa, Almatıdağı Abay-Nazarbaev köşeleriniñ qiılısında şamamen 150-ge tarta adam jinalğan. 15 şaqtı adamdı policiya wstap äketti. Wstalğandar qatarında azamattıq belsendi Asya Tulesova da bar. Şeruge şıqqandar «Nazarbaev jüyesi qwrısın!», «Jer satılmasın!», «Nwr Otan partiyası taratılsın!» dep ayqayladı. Jappay wstalular astanada da jalğasıp jatır.

Foto: QT

Almatıdağı Abay alañı mañına jinalğan narazı jwrtpen tildesu maqsatında äleumettik äl-auqat basqarmasınıñ basşısı Daniyar Älkebaywlı men Medeu audanınıñ äkimi Swltanbek Mäkejanov keldi. Şamamen sağat 11.25-te Dempartiya köşbasşısı Janbolat Mamay da narazı top qatarına qosıldı. Belgili jurnalist Ermwrat Bäpi de şeruge şıqqan.

Foto: QT

Mitingke qatısuşınıñ biri: «Bügingi biz bilikke öz talaptarımızdı aytuğa keldik. Bilikte otırğan eski jüyeni qoldauşı şaldar ornınan ketsin. 80-90 jasqa kelip, äli el basqarıp otır. Halıqta bar mäsele, uayım-qayğı olarda joq. Endi jastarğa orın bersin», – deydi.

Foto: QT

6 mausım tañerteñnen beri Dostıq dañğılı men Qwrmanğazı köşesinen joğarı qaray jayau jürginşiler qozğalısı şekteldi. Sonımen qatar Abay men Nazarbaev, Qwrmanğazı men Qonaev qiılısına beketter qoyılğan. Oppoziciya mitingileriniñ dästürli ornına aynalğan «Astana» jabıldı. Atalğan jerde de policeyler men avtozaktar twr.

Foto: QT

Bügin Almatı qalasınıñ bas sanitar därigeri Jandarbek Bekşinniñ tapsırmasımen qalada adamdar köp jinalatın orındardı dezinfekciyalau jwmıstarı bastalğan. Bir qızığı, bwl şara «Qazaqstannıñ demokratiyalıq partiyasın» qwrğısı keletin bastamaşıl toptıñ jetekşisi Janbolat Mamay men oppoziciyalıq sayasatker Mwhtar Äblyazov josparlağan miting künimen qatar kelip otır.

Üş ayğa sozılğan karantinnen keyin alğaş ret miting josparlanıp otır. Soñğı ret 1 naurızda Qazaqstannıñ birneşe qalasında belsendiler wyımdastırmaq bolğan mitingi ornına jaqındağandardı da policiya jappay alıp ketken.

"The Qazaq Times"