Foto: newsone.ua

Keşe Zimbabve äskeri memleket basşısı Robet Mugabe men onıñ otbası müşelerin twtqınğa alğanı turalı habar taradı. Äskeriler Harare köşesi boyında sap tüzep, Parlament ğimaratın qorşauğa aldı jäne memlekettik radio men telearna arqılı resmi habarlama tarattı. Olardıñ aytuınşa, äskerdiñ közdegeni - el Prezidenti emes, onıñ mañındağı jemqor şeneunikter. Memleket basşısı men onıñ jaqındarınıñ ömirine eş qauip tönip twrmağanın jetkizgen äskeri qolbasşı Sibusiso Moyo öziniñ qol astındağılardıñ äreketin "memlekettik töñkeris" dep ataudan bas tarttı. 

Äsker basşısı memlekettik qılmıs jasağan şeneunikter qolğa tüsken sätten bastap, barlığın bwrınğı qalıpqa qaytaruğa uäde berdi. Prezident twratın audanda memlekettik äskerdiñ qatısuımen atıs bolğanı turalı aqparattan keyin, bükil älemdik qauımdastıq atalğan iske qatıstı alañdauşılıq bildire bastadı.

Oñtüstik Afrika Prezidenti Djeykob Zuma Robert Mugabeden öziniñ üy qamaqta otırğanı turalı habar alğanın aytadı. Qazir Prezident pen onıñ äyeli jäne birqatar sayasi jaqtastarınıñ qayda ekeni belgisiz. Oñtüstik AFrikanı damıtu qauımdastığı Zimbabvedegi sayasi dağdarıstı şeşu üşin Botsvanada Euroodaq, Wlıbritaniya men BWW qatısuımen kezdesu ötkizetinin mälimdedi.

Robert Mugabe eldi Zimbabve Wlıbritaniyadan täuelsizdigin alğan 1980 jıldan beri basqarıp keledi. 93 jastağı Prezidenttiñ bilikten ketetin küni jaqındağalı, onıñ ornın basatın kelesi twlğa turalı boljamdar jiiledi. Ötken aptada sırqattanıp, tösek tartıp jatqan Robert Mugabeniñ Prem'er-ministr Emmerson Mnangagvanı qızmetinen bosatuı bilikke talastı qızdıra tüsti. Ondağan jıldar boyı Prezidenttiñ eñ jaqın adamdarınıñ biri bolıp kelgen Mnangagva Oñtüstik Afrikağa barıp, memleket basşısınıñ astırtın isteri  men onıñ äyeli Greys Mugabeniñ kezekti Prezident bolu turalı maqsatın äşkereleytin, 5 betten twratın bayandama jariyaladı. General Konstantino Çivenga düysenbi küni baspasöz konferenciyasın ötkizip, Prezident partiyanıñ beldi köşbasşıların Mnangagvanıñ izimen "alıp tastau operaciyasın" jalğastıratın bolsa, onı toqtatu üşin qajetti şaralar qabıldaytının jetkizdi.

Zimbabve halqı özderin soñğı sayasi oqiğalarğa qatıstı qala köşelerine şığıp, narazılıq bildiruden aulaq wstap otır. APF aqparattıq agenttiginiñ tilşisi jergilikti halıqtıñ oyın swrağanda, olar bwl oqiğanıñ joğarıdağı toptar arasında bolıp jatqanın äri toptarğa birikken jwrtşılıq köşedegi äskeriler tarapınan küş körsetu faktilerine tap boludan saqtanatındıqtarın aytqan.

Zimbabvedegi sayasi dağdarısqa qatıstı reportaj jasauğa kelgen birqatar şeteldik jurnalist äuejaydan keyin qaytarılğan. Sarapşılar Ükimettiñ bolğan oqiğa turalı pikir bildirmey, ünsiz qaluı Prezident biliginiñ soñınan jetkenin körsetedi dep esepteydi. Robert Mugabe älemdegi eñ egde jastağı memleket basşısı esebinde Zimbabve ekonomikasın eñ tömengi jağdayğa jetkizdi. Qazir eldegi jwmıssızdıq deñgeyi 90 payızdan köp. 2009 jılı giperinflyaciya äserinen memleket öziniñ wlttıq valyutasınan bas tartqan.

Osıdan bwrın Robert Mugabe kelesi jılı Prezident saylauın ötkizetinin habarlağan edi. Negizgi ümitkerler, sayasi tartıstıñ eki wşın wstap otırğan Prezidenttiñ ömirlik jarı Greys pen bwrınğı vice-Prezident Mnangagva. Biraq olardıñ arasındağı sayasi oyın memleket äskeriniñ bilikti öz qolına aluı arqılı jaña bağıtqa oyıstı. Äzirge özderiniñ "memlekettik töñkeris" jasağandarın moyındamay otırğan äskerdiñ kelesi qadamı qalay bolatını belgisiz...

“The Qazaq Times”