Ötken aptadağı 68 ölim. Kovidtik pnevmoniyanıñ aymaqtıq bölinisi turalı DenMinniñ manipulyaciyası

Ötken aptada dertten 68 adam qaytıs boldı. Densaulıq saqtau ministrliginiñ qoğammen kommunikaciyağa jauaptı resmi ökili Bağdat Qojahmetovtiñ izi belgisiz şala aqparatı jurnalisterdi äurege saldı. Ol koronavirustıq pnevmoniyanıñ aymaqtardağı deregin jariyaladıq dese de, bwl mälimet coronovirus2020.kz saytı men DenMin resurstarınıñ eşbirinde joq. Eñ qajetti eki sayt eñ bayau jañaratın küyge tüsti. Ministrdiñ bir sözi mıñ türlendi. Nege? 

Qırküyek ayı bastalğalı beri 500-ge tarta adam koronavirus, tağı 2 mıñnan astamı kovidtik pnevmoniya jwqtırğanı anıqtalğan. Osı aydıñ alğaşqı altı küninde PTR testimen rastalğan nauqastardıñ arasında 40 nauqas, derti aqökpege asqınğan 22 pacient qaytqan.

Resmi statistikağa sensek, ötken aptada, 31 tamız-6 qırküyek aralığında KVI+ diagnozı boyınşa 46, KVI- diagnozı boyınşa 22 adam köz jwmğan. Sonımen birge, bir aptada 2 614 adamnıñ dertke şaldıqqanı belgili bolğan. Degenmen bwl derekterdiñ täuliktik bölinisin  şınayı dep tolıqtay aytuğa kelmeydi. Sebebi eldegi medicina wyımdarı men ministrlik demalıs künderi (senbi-jeksenbi) aurudı tirkeu, qabıldau jwmısın bäseñdetedi. Mwnı kündelikti statistikadan köruge boladı. Är aptanıñ aqırına qaray esep kürt kemip otıradı. Al bwl jauaptı mekemeler men vedomstvonıñ pandemiya şartına säykes ştattıq rejimde jwmıs istemeytindigine tikeley baylanıstı.

Ükimet jolğa qoya almay kele jatqan tağı bir özekti mäsele – kovidtik pnevmoniyanıñ aymaqtarğa taraluı turalı aqparattıñ joqtığı. Qazaqstan  13 naurızdan beri koronavirus jwqtırğandardıñ öñirler men qalalardağı sanın üzbey jariyalap keledi. Biraq «mausım-şilde qırğınında» talay otbasına qayğı äkelgen koronavirustıq pnevmoniyanıñ aymaqtıq atlası ministrdiñ uädesine qaramastan jolğa qoyılmay keledi. 3 tamız küni densaulıq saqtau ministri Aleksey Coy, 10 tamız DenMinniñ resmi ökili Bağdat Qojahmetov, 26 tamız onıñ kömekşisi Erbol Mändibek mine-mine deumen neşe märte söz bergen. Tipti «aşıqtıq pen şınayılıqtı» jii alğa tartatın Qojahmetov köpşiliktiñ közinşe  «bwl turalı jariyalağamız, ministrlik bärine aşıq» dep quaqılıqqa salıp keledi. Dese de, vedomstvonıñ saytı men resurstarınıñ eşbirinde koronavirustıq pnevmoniyanıñ aymaqtardağı körsetkişi turalı derek joq. Özinen swrasaq, eski derekterdi wsınıp, siltemesin jolday almadı. Öytkeni resmi mälimdemesinde aytqanday jariyalanbağan.

4 qırküyek küni ötken brifingte «Bwl aqparat bar. Nelikten sizdiñ qolıñız jetpey twrğanın tüsinbey twrmın. Negizi bwl aqparat bar, aşıq türde jariyalanğan. Press-brifing bitken soñ habarlasıp, siltemesin beretin bolamız» degen resmi ökil iske kelgende tosırqadı.

Qırküyektiñ 5-i küni DenMinniñ resmi ökili Bağdat Qojahmetov redakciya saualına 1-22 tamız kündergi derekti joldaptı. Bügingi tañda mañızı joq derekti nege jibergeni belgisiz. Toqaev köp söz tetin «Estuşi memlekettiñ» eñ estiyarımın degen kadrları BAQ institutı, halıqpen osılay jwmıs istep keledi.

35 kün ilgeri, tilşiler aldına soñğı ret şıqqan küni DenMin basşısı Coy aymaqtardağı koronavirustıq pnevmoniyanıñ körsetkişi dayın ekenin jäne sol aptada-aq twraqtı türde jariyalaudı jolğa qoyuğa söz bergen.

«Aymaqtardağı körsetkişin saytımızda jariyalaymız. Tap qazir qolımda bar. Negizi mwnday köp cifrı bar materialdı elektrondı ne qağaz türinde jariyalağan dwrıs dep oylaymın. Osı aptada jariyalap, körsetemiz», – degen ministr 3 tamızdağı OrtKom brifinginde.

Biraq 24 tamız küngi baspasöz jiınında Qojahmetov ministr bergen uädeniñ dedlaynın korreciyaladı. «Iä, ökinişke oray, därigerler PTR testi teris körsetken nauqastardı derekqorğa engizu mehanizmin äli de üyrenip jatır. Aldağı 2-3 apta işinde ne bir ayda bwl aqparattı apta sayın berip twramız. ...Mümkin ol kisi bir aptada jolğa qoyılatın şığar dep ümittengen şığar», – dedi ol.  Al ötken jwmadağı brifingte saytqa jariyalap otırmız dep ağınan jarıldı.

1 tamızdan jariyalana bastağan jaña formattağı statistikağa Qazaqstan ükimet 11-30 şilde aralığında jiırma kündey dayındalğan. Alayda jañartılğan esepke aydan assa da jüyeli jolğa qoyılmay keledi.

Qazaqstanda pandemiya kezinde bilik moyındağan auru jağdayı (U07.1+U07.2)  134 mıñnan astı. İndettiñ kesirinen ömirden ötken qazaqstandıqtardıñ sanı – 1 948 (U07.1+U07.2).  Mwnıñ sırtında 556 adam koronavirustıñ janama äserinen qaytıs bolğandar retinde jalpı sanaqqa engizilmegen. Aytpaqşı, osı 556 keysti biluge tilşiler samarqau vedomstvomen 44 kün aytısıp-tartısqan. Pandemiya moderatorı DenMinniñ «mobil'di şapşañdığınıñ» siqı osı.

"The Qazaq Times"