Foto: AFP

Auğanstannıñ astanası Kabuldağı Intercontinental qonaq üyine qarulı top tarapınan jasalğan şabuıl toqtatıldı. İşki İster ministrliginiñ mälimetinşe, üş şabuılşımen qatar, altı qonaq (bireui - şeteldik) oqiğa ornında  qaza tapqan. Auğanstannıñ qauipsizdik küşteri ğimarattı bosatu operaciyası barısında 160 adamdı qwtqarğan. Onıñ 41-i - şet el azamatı, jaralanğandar - jeteu. Jergilikti Tolo aqparattıq agenttigi öz tilşisiniñ qonaq üydiñ işinde tağı birneşe adamnıñ öli denesin körgeni turalı jazıp, qwrban bolğandar sanı resmi derekterden artıq boluı mümkin degen boljam jasaydı. Bwl turalı VVS aqparattıq agenttigi jazdı. 

Auğanstannıñ Kam Air äue kompaniyası qatarındağı şeteldik azamattardı qosqanda, qonaq üyde 42 qızmetkerdiñ bolğanın, onıñ beseui şabuılşılardıñ qolınan mert bolıp, 18-i izdeude ekenin jariyaladı. Joğarğı qabattarda twratın qonaqtar öz qabattarında ört bastalğan kezde, tösek jaymalarınıñ kömegimen terezeden jerge tüspek bolğan. Osınday jolmen ömirin saqtap qalmaq bolğandardıñ biri Mwhammed Mwsa jerge qwlap, jaraqat alğanın aytadı.

Afghan Telecom kompaniyasınıñ öñirlik direktorı Aziz Tayeb qarulı top kirip kelgende sırtqı esikke qaray bettep kele jatqan. Birden jasırınıp ülgergen ol, birneşe sekund bwrın alañsız tamaq işip otırğan adamdardıñ bir sätte ayqayğa basıp, jügirgenin, bireulerdiñ oqqa wşıp, qwlağanın öz közimen körgenin aytadı. Onıñ habarlauınşa, qılmıstıq top müşesiniñ biri özge seriktesterine: "Biriñ de tiri qaldırmañdar! Bärin atıñdar!" degen bwyrıq bergen.

Auğanstannıñ qauipsizdik küşteri şeteldik äriptesteriniñ kömegimen qonaq üydiñ töbesine tikwşaqpen qonıp, qwtqaru operaciyasın tañğa deyin jürgizdi. İşki İster ministrligi qonaq üydiñ qauipsizdik qızmeti osıdan eki apta bwrın jeke kompaniyağa berilgenin aytıp, şabuılşılardıñ ğimaratqa qalay kirgenin anıqtaytının mälimdedi. Qonaq üy basşısı qarulı toptıñ as üy arqılı işke engenin aytadı.

AQŞ-tıñ Kabuldağı elşiligi oqiğa bolardan birneşe kün bwrın kelesi mätindegi eskertu jazbasın jariyalağan bolatın: "Bizge ekstremistik toptar Kabuldıñ qonaq üylerine qarsı şabuıl dayındap jatqanı jöninde aqparat tüsti. Bwl qonaq üylerden bölek, şeteldikter köptep jinalatın qoğamdıq kölik, jergilikti bazar, ne basqa da orındar boluı mümkin".

Intercontinental qonaq üyi  osı attas älemdik qonay üyler jelisine kirmeydi. Ol  - ärtürli bağıttağı jiındar ötkizip,  şeteldik qonaqtardı qabıldauğa arnalğan memlekettik qonaq üy. Atalğan qonaq üyge jasalğan şabuıldı äzirge "Taliban" terroristik wyımı öz moynına alıp otır.

“The Qazaq Times”