"Özge sputnikterdi joyatın qwral". AQŞ pen Britan Reseydi osınday apparattı sınaqtan ötkizdi dep mälimdedi. Olardıñ aytuınşa bwl apparat ğarışta wşıp jürip özge sputnikterdi joya aladı.

AQŞ Reseydiñ ğarıştıq äreketterine bwğan deyin de birneşe märte alañdauşılıq bildirgen. Britan biligi alğaş ret ün qostı. Ağılşın parlamenti birneşe kün bwrın osığan qatıstı arnayı zertteu jürgizip, öz ükimetin Reseydiñ ğarıştıq äreketterine jeterlik deñgeyde nazar audarmadı dep sınğa aldı.

AQŞ pen Britaniyanıñ alañdauına negiz joq emes. Aqpanda Pentagon reseylik jasandı jerseriginiñ (sputink) amerikalıq jerserikterge jaqın wşıp ötkeninin mälimdedi. Bwl Qwrama Ştattıñ wlttıq qauipsizdik organdarın alañdatqan. Al, säuirde Mäskeu jerden wşıp barıp sputnikti joya alatın zımıran sınağında tabısqa jetkenin jariyağa jar salğan.

Soñğı on jıldağı ğarıştıq qaru-jaraq tehnologiyasında tek tört el ğana – Resey, AQŞ, Qıtay jäne Ündistan sputinkterdi joya alatın tehnologiyasın körsete aldı. Olar negizinen eki türge bölinedi, biri jerden atılatın zımıran bolsa, ekinşisi lazer qaruı.

Al, Uaşington men Londonnıñ soñğı mälimetine sensek, Resey keñistikte wşıp jürip-aq özge sputinkterge qauip töndiretin qwralğa qol jetkizgen. Sputinkter ädette auarayın boljauğa, mälimetter toptauğa, baylanıs tüzuge jäne izdeu tehnologiyasına qoldanıladı. Eger Resey bwnday tehnologiyağa ie bolsa onda ğarış bäsekesinde ırıqtı bola tüspek.

Älemde AQŞ, Resey, Britaniya jäne Qıtaydı qamtığan jüzge juıq memleket beybit maqsatta keñistikke jasandı jer serikterin ornalastırğan. Bwl elder arasındağı halıqaralıq mañızdı kelisim boyınşa keñistikke qauipti qwral ornalastıru şektelgen.

Qalay desekte, soñğı jıldarda ğarış bäsekesiniñ arta tüskeni mälim. Derjavalardıñ közdegeni Kün tübinde bolsa da, Jerdegi jwmır bastı pendeler üşin beybitşilikten artığı joq. Aldağı uaqıtta, şaması jetken eldiñ bäri qwrlıq, äue jäne teñiz küşteri sekildi ğarış küşterin damıtuğa den qoymaq. Qwrama Ştattarda bwdan eki jıl bwrın Ğarış armiyası qwrılğan bolatın.

"The Qazaq Times"