Бас прокурор Қайрат Қожамжаров жолаушылар тасымалы саласына тексеру жұмыстарын жүргізуді тапсырды.

Бас прокуратура баспасөз қызметі таратқан мәлімет бойынша, қазіргі таңа Қазақстан аумағында жолаушылар тасымалы техникалық ақауы бар және заңсыз жолмен қайта жабдықталған автокөліктер арқылы жүзеге асырылуда. Аталмыш жағдайлар жолаушылар денсаулығына орны толмас зардап алып келіп, адам өліміне себепші болып отыр. Осыған байланысты Бас прокурор Қайрат Қожамжаров көлік прокуратурасы мен облыс прокурорларына аталған салада тексерулер ұйымдастыруды тапсырған.

Естеріңізге салайық, 18 қаңтар күні Ақтөбе облысында 57 адам мінген автобус өртке оранған болатын. Салдарынан 52 адам көз жұмып, бес адам түрлі дене жарақаттарын алған. Тексеру жұмыстары барысында автобустың екі жыл бойы техникалық бақылаудан өтпегендігі және ешқандай қауіпсіздік ережелеріне сай келмейтіндігі анықталған.

“The Qazaq Times”