Орталық Азия елдерінің алдына оңтүстік немесе солтүстік екеуінің біреуін таңда деген жалған таңдау қоюдың қажеті жоқ – деп мәлімдеді Ресей Сыртқы істер министрі Сергей Лавров.

Сергей Лавров Орталық Азия елдеріне қатысты БҰҰ-ның Қауіпсіздік Кеңесінде сөйлеген сөзінде: «Орталық Азия елдерінің алдына оңтүстік немесе солтүстік екеуінің біреуін таңда деген жалған таңдау қоюдың қажеті жоқ. Аймаққа барлық жақпен жан-жақты әріптестік орнату қажет және аталмыш елдердің ТМД, ЕАЭО, ШЫҰ шеңберіндегі міндеттемелерін құрметтеу керек» - деген.

Естеріңізге салайық, бұған дейін Сергей Лавров Қазақстан президенті Нұрсұлтан Назарбаевтың Уашингтонға ресми іс-сапары қарсаңында АҚШ пен Орталық Азия елдеріне ескерту жасаған болатын. Онда ол: «Егер біздің америкалық әріптестеріміз біздің орталық азиялық достарымызбен кездесуінде экономика емес геосаясат тұрғысында келіссөдер жүргізетін болса, онда олардың барлығы бұның жақсылыққа апармайтынын көретін болады» -деп мәлімдеген.

“The Qazaq Times”