Фото: Zakon.kz

Алада келе жатқан парламент сайлауы партиялық тізім бойынша болады.

Экс-президент Нұрсұлтан Назарбаев «Нұр Отан» партиясы саяси кеңесінің кеңейтілген отырысында алда келе жатқан парламент сайлауына қатысты мәлімдеме жасады.

«Келесі мәслихат сайлаулары мәжіліс сайлауы сияқты партиялық тізімі бойынша болады. Біз кейбір блогер оппоненттерімізден мажоритарлық сайлау жүйесіне өту туралы ұсыныстарды естіп жатырмыз. Бұндай бастамаларға жауап беру керек. Бұл жерде нақты ұсыныс жоқ, сол баяғы сылдыр сөз. Билікті құрғақ сөзбен сынауда. Не істеу керектігін айтып, біреу ұсыныс жасаса игі. Біз демокартияның бастауы санайтын Еуропа елдерінің 63 пайызы сайлауды пропорционалдық жүйе бойынша өткізеді. Мажоритарлық жүйе негізінен партиялық жүйесі әлсіз,  бір адамға негізделген Азия елдеріне тән. Пропорционалдық жүйе халықаралық демокартия негіздеріне сай. Партия жұмыс істеп, мәселені шешетін нақты ұсыныстар жасауы тиіс. Сол кезде бедел мен халық қолдауы болады» - деді Назарбаев.

Бұдан бөлек «Нұр Отан» көшбасшысы барлық сайлаулар заң бойынша уақытында өтетінін айтып, бұл тақырыпта әңгіме қозғауды қою керектігін айтты.

Соңғы рет Қазақстанда парламент сайлауы 2016 жылы болған. Заң бойынша келесі сайлау 2021 жылы өтуі тиіс. Бірақ бірнеше айдан бері қазақ қоғамында күзде немесе қаңтар-ақпан айларында кезектен тыс парламент сайлауы өтуі мүмкін деген әңгімелер қызу талқылануда.

Қазіргі уақытта Қазақстанда жеті саяси партия бар. Олардың ішінде тек бір ғана ЖСДП «Ақиқат» партиясы  өзін оппозициялық деп жариялаған. Қалған партиялардың барлығы билікпен ымыралас саяси топтардан жасақталған.

"The Qazaq Times"