Ғасыр жылнамасында тағы бір жыл тарих қойнауында қалмақ. Өткен 2020 жылы әлем соңғы 100 жыл ішінде болмаған аса күрделі дағдарысқа тап болып, індетпен күресті. Әйткенмен, бұл қиындықты барша ел бірлесе еңсеруге тырысты. 

«The Qazaq Times» сайтының да елдегі санаулы тәуелсіз БАҚ қатарына қосылып, өз оқырманына барынша адал қызмет көрсетуге тырысып қызмет атқарғанына жақында ғана төрт жыл толды. Осы уақыт ішінде азаматтық қоғамның қалыптасуына, тәуелсіз журналистиканың нығаюына күш-жігерімізді салып келеміз. Әсіресе, қазақ тілді ақпарат кеңістігінде кенжелеп қалған халықаралық тақырыптарды, онда да әлемге, халықаралық қатынастарға, әлемдік саяси, экономикалық өзгерістерге қазақ көзімен қарауға тырыстық. Осы ретте сайт оқырмандары мен барша Қазақстан халқын Жаңа жылмен құттықтаймыз!

Жаңа 2021 жыл жақсылықтарға, жеңісті де жемісті күндерге толы болсын! Әр шаңыраққа құт-береке, ынтымақ, қызметте мол табыс тілейміз! Барлық салада, саясат сахнасында Қазақстан іргелі жетістіктерге жете бергей! Жаңа жыл жақсы күндер мен жаңа мүмкіндіктер сыйласын!

"The Qazaq Times"