Украина президенті Владимир Зеленский. Фото: https://sputnik.kg

Украинаның орталық сайлау комиссиясы дауыс берудің ресми қорытындысын жариялады.

Нәтижесінде Владимир Зеленский Украина президенті атанды. Екінші кезеңде шоумен дауыс берушілердің 73,22% қолдауына ие болған. Ал оның қарсыласы, елдің қазіргі басшысы Петр Порошенкоға 24,45% тұрғын дауыс берген.

Сайлаудың екінші туры 21 сәуірде өтті. Дауыс беруге ел халқының 61,3% -ы қатысты. Осыған дейін яғни 19 сәуірде Киевте президенттікке кандидаттар арасында дебат өткен болатын. Дебатта Владимир Зеленский 2014 жылы Порошенко үшін дауыс бергенін, бірақ бұл қадамның қате екендігін айтты: «Біз сіз үшін дауыс бердік. Алайда, Порошенконың екі бейнесі бар еді. Біз қолдаған Порошенко «Путин, мен саған көрсетемін. Ресей – агрессор» – деді. Ал екінші бейнеңіз жасырын түрде Медведчук мырза арқылы Мәскеуге сәлемдеме жіберіп отырды. Мен сіздің қателіктер мен уәделеріңіздің нәтижесімін», – деген болатын.

Жаңа президенттің инаугурациясы Жоғарғы рада (парламент) белгілеген күні өткізіледі. Заң бойынша инаугурация сайлаудың ресми нәтижесі жарияланған соң 30 күн ішінде өткізіледі.

Айта кетейік, 41 жастағы Владимир Зеленский – актер, шоумен, продюсер және «Квартал-95» студиясының жетекшісі. Президенттікке кандидат болардан бұрын саясатта жүрмеген, бұрын-соңды мемлекеттік лауазымда болмаған.

"The Qazaq Times"