Қазақстан президенті Қасым-Жомарт Тоқаевтың Германияға іссапары, 05.12.19 ж. Фото: http://www.exclusive.kz

Президент Қасым-Жомарт Тоқаевтың Германиядағы ресми іссапары басталды.

Қазақстан делегациясының сапары екі күнге жоспарланған. Ең маңызды келіссөздер Германия канцлері Ангела Меркельмен және президенті Франк Вальтер Штайнмайермен өтеді. Сондай-ақ бизнес қауымдастықпен кең ауқымды кездесу ұйымдастырылып, Берлин Еуразиялық клубының 28-отырысы өтеді.

Мемлекет басшысы сөзінде: «Мен өзімнің сайлауалды бағдарламам мен халыққа арнаған жолдауымда қоғамды саяси жаңғырту жөнінде айттым. Осы салада жаңа реформаларды қолға алмасақ, экономиканы одан әрі дамыту мүмкін емес. Мұны түсіну үшін Маркстың еңбектерін оқып шығу керек. Экономика мен саясат бір-бірімен тығыз байланысты», – деп атап өтті.

Хаттама талаптарына сай салтанатты қабылдау, іскерлік түскі ас және баспасөзге арналған мәлімдеме де қарастырылған. Келіссөздер екі ел арасындағы стратегиялық серіктестіктің жаңа бағыт-бағдарын айқындауға арналады. Әрі құны 2 миллиард АҚШ доллары болатын құжаттарға қол қойылмақ.

Германия Қазақстанның ең ірі үш сауда әріптесінің қатарына кіреді. 2017 жылы шілдеде Қазақстан мен Германия іскерлік кеңесінің отырысында құны 872 млн еуроға бағаланатын 21 келісімге қол қойылды. Ал биыл 25 наурызда Германия Қарулы Күштерінің әскери қимылдарды модельдеу және әскери медицина саласында цифрлық мониторинг жүйесін пайдалануды үйрену мақсатында арнайы жасақ бөлімшелері арасында тәжірибе алмасу туралы келісімдерге қол қойылды. Бүгінге дейін Германия Қазақстан экономикасына шамамен 8,5 миллиард доллар құйған.

Айта кетейік, президенттік лауазымына кіріскелі Қ.Тоқаев Ақ үй басшысы Дональд Трамп, Швейцария президенті Ули Маурер, Украина президенті Владимир Зеленский, Грузия президенті Саломе Зурабишвили сынды саясаткерлермен кездесті.

"The Qazaq Times"