Russian President Vladimir Putin and Kazakh President Nursultan Nazarbayev; Photo: politobzor.net

Мәскеудің «Украина Ресей Федерациясының шекара заңын бұзды» деген шешіміне Қазақстан, Қытай және Боливия елдері қолдау көрсетті. Бұл туралы BBC хабарлады.

Кеше өткен жиында БҰҰ Қауіпсіздік кеңесінің мүшелері Мәскеу ұсынған «Украинаның Ресей шекарасын бұзуы бойынша» отырыстың күн тәртібін мүлде қабылдаған жоқ. АҚШ пен Ұлыбританияны қоса алғанда жеті ел Ресейге қарсы дауыс берген. Ал Қытай, Қазақстан және Боливия Ресейді жақтаса, төрт ел қалыс қалды. Кеңес отырысында сөз сөйлеген АҚШ, Ұлыбритания, Франция, Польша және Швеция өкілдері Ресейді қатаң сынға алды.

Ұйым мүшелерінің кездесуінде НАТО және ЕО елдері Украинаның аумақтық тұтастығына қолдау білдіріп, Ресейден теңіздегі кемелердің еркін қозғалысын қайта қалпына келтіруді талап етті. Енді Брюссельде Керчь бұғазында болған оқиғаға байланысты Еуропалық Одақтың Саясат және қауіпсіздік комитетінің отырысы өтеді.

Еске сала кетейік, 25 қарашада Одессадан Мариупольге қарай бағыт алған украиналық үш әскери кемеге Ресей сарбаздары оқ жаудырып, басып алған. Осы жағдайдан соң Украинада бір айға әскери жағдай енгізілді. 

"The Qazaq Times"