Көрнекі сурет. Фото: obzor.io

Кеше, 6 ақпан Шешенстанда Ресейдің «Новая газета» басылымының тілшісі мен заңгеріне шабуыл жасалғаны хабарланды.

Аймақ астанасы Грозный қаласындағы қонақ үйлердің бірінде бір топ бұзақы журналист Елена Милашина мен адвокат Марина Дубровинаға қол көтеріп, тепкіге алған. Оқиға әуесқой бейнежазбаға түсіріліпті.

Милашина мен Дубровина Грозныйға блогер Ислам Нухановтің ісі бойынша сотқа қатысу үшін барған. Грозный орталығындағы элиталық аудан туралы бейнежазба түсіріп, Youtube-ке салған Ислам Нухановқа бұған дейін полиция «заңсыз қару-жарақ сақтады» деп айып таққан. Нуханов видеоға түсірген элиталық ауданда Шешенстан басшысы Рамзан Қадыровтың туыстары мен айналасындағы адамдар тұрады.

Журналист пен адвокат шабуылға байланысты Шешенстан полициясына арыз түсіретінін айтады.

Құқығы аяқасты болған журналист Шешенстандағы адам құқығының бұзылуы туралы көптеген зерттеу жасап, ел  басшысы Рамзан Қадыровты өткір сынап келеді. Соңғы жылдары Шешенстан адам құқығы жиі бұзылып, сөз бостандығына зор қысым түсетін аймақ ретінде көзге түсе бастады.

“The Qazaq Times”