Фото: Associated Press © 2017, Jung Yeon-je

Оңтүстік Кореяның апелляциялық соты елдің бұрынғы президенті Пак Кын Хені 25 жылға бас бостандығынан айырды, деп жазады «lemonde.fr». Осылайша,  сот осы жылдың сәуір айында енгізілген үкімді өзгерткен.

Апелляциялық сот Пак Кын Хеге қарсы істі алдыңғы үкімді өте әлсіз деп санаған прокурорлардың  талабынан кейін қайта қолға алған еді. Осыдан бұрын да сайтымызда жазғанымыздай, Пак Кын Хе жемқорлық пен қызметін асыра пайдаланушылыққа қатысты айыпталған. Елдің бұрынғы президентіне қатысты саяси дау 2016 жылдың қазан айында басталған. Зерттеу нәтижесінде Хенің жақын құрбысы Чхве Сун Силь ұзақ жылдар бойы мемлекеттік істерге араласып, жоғары деңгейдегі саяси шешімдердің қабылдануына киліккен. Одан бөлек, экс-президенттің құрбысы өзіне қарасты қорларға миллиондаған доллар аударылуы үшін көптеген компанияларға қысым көрсеткен. Еске салайық, Пак Кын Хе президенттік лауазымнан 2017 жылдың сәуір айында шеттетілген еді.

“The Qazaq Times”