ҚР Президенті Нұрсұлтан Назарбаев пен Ауыл шаруашылығы министрі Асқар Мырзахметов. Фото: akorda.kz

ҚР Президенті Нұрсұлтан Назарбаев Премьер-Министрдің орынбасары – Ауыл шаруашылығы министрі Асқар Мырзахметовті қабылдады Кездесуде еліміздің агроөнеркәсіптік кешенін дамыту бағдарламасы арқылы атқарылған жұмыстардың аралық нәтижелері және оны одан әрі іске асыру жөніндегі жоспарлар талқыланды, деп хабарлайды Ақорданың ресми сайты. 

Нұрсұлтан Назарбаев еліміздің барлық диқандарын астық жинау науқанының табысты аяқталуымен құттықтады.

"Жаз айларының басындағы күрделі жағдайға қарамастан, ауыл еңбеккерлері айтарлықтай көлемде астық жинады. Ішкі қажеттілікті қанағаттандыруға және өнімімізді экспортқа шығаруға мүмкіндік бар. Жалпы, барлық мәліметтер оң қарқынды көрсетіп отыр", – деді Қазақстан Президенті.

Мемлекет басшысы ауыл шаруашылығының ел экономикасындағы маңызды рөліне тоқталып, осы салаға бөлінген қаржыны пайдаланудың тиімділігі төмен екенін атап өтті. Сонымен бірге, Қазақстан Президенті биылғы астық жинау науқаны жоғары қарқынмен жүргізілгенін айтты.

"Биыл 21,7 миллион тонна астық жиналып, орташа өнімділік гектарына 14,2 центнерден болды. Бұл былтырғы жылмен салыстырғанда көбірек. Белгіленген жоспарға сәйкес, біз тұтынушылық кооперацияны дамытумен, тұқымдық қорды жақсартумен және мал шаруашылығының өнімділігін арттырумен айналыстық", – деді Президент.

Нұрсұлтан Назарбаев ауыл шаруашылығы өнімділігінің көлемін еліміздің ғылыми әлеуетін пайдалана отырып арттыру қажеттігіне назар аударды.

Асқар Мырзахметов Қазақстан Президентіне агроөнеркәсіптік кешеннің мемлекеттік бағдарламасы аясында ауыл шаруашылығының 12 басым бағытын одан әрі дамытудың арнайы карталарын әзірлеу барысы жөнінде баяндады.

“The Qazaq Times”