Өзбекстанда он жастағы қыздан коронавирустың британдық жаңа түрі табылған. (Ескерту, фотодағы кейіпкердің аталған науқаспен қатысы жоқ). Фото: www.aa.com.tr

Британияда белгілі болған коронавирустың жаңа түрі Өзбекстанда анықталды. Вирустың бұл қауіпті түрі ата-анасымен бірге Біріккен Араб Әмірлігінен ұшып келген он жастағы өзбекстандық қыздан табылған.

Өзбекстан Денсаулық сақтау министрлігінің мәліметіне қарағанда, елде коронавирусқа шалдыққандардың жалпы саны 78 мыңнан асқан. Соңғы тәулікте 44 адам індетке шалдыққан. Бірақ, ресми мәліметтерге сенсек, өзбек елінде вирусқа шалыдаққандардың шамамен 98 пайызы жазылып шыққан. Қаза болғандар саны 634 адам.

Алайда, коронавирустың британдық штаммы Өзбекстанның ДСМ мен үкіметін алаңдатып отыр. Жоғарыда аталған науқастан британдық штаммның бар екені туралы мәлімет 30 қаңтар күні тіркелген. Науқасты қайталай тексеруден өткізіп, Британияда белгілі болған коронавирустың қауіпті жаңа түрінің бар екенін толық тұрақтандырған.

Дегенмен, Өзбекстан ДСМ тарабы елдегі эспидемия жағдайының тұрақты және бақылауда екенін айтады.

“The Qazaq Times”