Еурокеңес төрағасы Дональд Туск және Ұлыбритания премьер-министрі Борис Джонсон. Фото: https://www.thesun.co.uk

Еуроодаққа мүше 27 ел Ұлыбританияның Brexit жоспарын үш айға – 2020 жылдың 31 қаңтарына дейін шегерді. Бұл туралы Брюссельде өткен жиында Еуропалық кеңес төрағасы Дональд Туск мәлімдеді.

«Еуропалық одаққа мүше мемлекеттер бір ауыздан Ұлыбританияның Brexit жоспарын 2020 жылдың 31 қаңтарына шегеруге келісті», – деді ол. Тусктың айтуынша, алдағы күндері бұл шешімге байланысты ресми құжат бекітіледі.

Ұлыбритания ЕО-дан 2019 жылғы 29 наурызда яғни қауымдастықтан шығу туралы жазбаша хабарлама берілген соң екі жылдан кейін шығуы керек еді. Алайда Британия Парламентінің Қауымдар палатасының депутаттары Брюссель мен Үкімет қол жеткізген Brexit шарттары туралы келісімнің жобасын үш мәрте қабылдаудан бас тартты. Нәтижесінде ЕО Brexit - ті алдымен сәуір немесе мамырға, содан кейін 31 қазанға көшіруге келісті. Саяси жағдайды тығырықтан шығара алмаған бұрынғы премьер-министр Тереза Мэй отставкаға кетуге мәжбүр болды.

"The Qazaq Times"