Түркия Ресейдің Су-57 ұшақтарын сатып алуы мүмкін.

CNN Turk телеарнасының мәліметінше, Түркия президенті Режеп Тайып Ердоған Су-57 ұшағын сатып алуға қызығушылық танытқан. Ол «МАКС-2019» әуесалонында журналистер алдында сөйлеген сөзінде: «Біз бұл жерге жайдан-жай келген жоқпыз. Бірақ нақты шешім АҚШ президентімен сөйлесіп, Түркияның F-35 ұшақ жобасына қатысты Уашингтон ұстанымын білгеннен кейін қабылданады» - деп мәлімдеген.

Бұған дейін Ресей президенті Владимир Путин Режеп Тайып Ердоғанға МАКС-2019 көрмесінде Су-57 ұшағын көрсетіп, тараптар ұшақты сатып алуға байланысты әңгіме қозғаған.

Осыдан біраз уақыт бұрын Петагон басшысы Марк Эспер «Түркия Американың F-35 ұшақтарын Ресейдің С-400 зымыран жүйелерінен толықтай бас тартқан кезде ғана сатып ала алады» деп мәлімдеген. Бірақ ресми Анкара С-400 әуе қорғаныс жүйесінен бас тартпайтынын айтқан.

"The Qazaq Times"