Президенттікке үміткер Владимир Зеленский Украинаның қазіргі басшысы Петр Порошенконың ұсынысын қабылдамады.

Сәуір айының 8-і күні Владимир Зеленский өзінің Facebook парақшасына видео үндеу жариялады. Онда ол Петр Порошенкомен болатын теледебаттың 19-шы сәуір күні Киев қаласындағы «Олимпиский» стадионында өтетіндігін айтты. Бұған дейін Порошенко Зеленскийге теледебатты сәуір айының 14-і күні өткізуді ұсынған.

Бұдан бөлек Зеленский өз жақтастарынан Порошенкоға қоятын сұрақтарды дайындауға көмек сұрады.

«Украина халқының соңғы 5 жылда Порошенкоға қоя алмай кеткен сұрақтары бар деп ойлаймын. Мен сіздердің аттарыңыздан сол сұрақтарды қоюға дайынмын. Сол себепті сіздерді толғандыратын сұрақтарды (Facebook парақшама-ред) пікір ретінде қалдыруларыңызда сұраймын» - деді Зеленский.

Естеріңізге салайық,  Украинада президент сайлауының бірінші туры наурыз айының 31-і күні өткен. Онда сайлау қорытындысы бойынша, Владимир Зеленский 30,22%, Петр Порошенко 15,93% дауыс жинап, екінші турға өткен. Сайлаудың екінші туры сәуір айының 21-і күні өтеді.

"The Qazaq Times"