Фото: mynet.com

Сүрия  үкіметтік әскерилері ел территориясынан террорлық «мектептер» тапқандары туралы ресми түрде мәлімдеді. Бұл турады Al Masdar News агенттігі хабарлайды.

Ресми ұйымдар тарапынан мәлімделген хабарламаларға қарағанда, аталған мектептерде балаларды қару қолдануға үйретіп, экстремистік идеялар мен исламның радикальды түсініктерін бойларына сіңіреді. Осындай «оқу орындарының» бірінің қабырғасынан ДАИШ-тың діни ұрандары мен негізінен осы ұйым тарапынан қолданылатын сөздер табылған. Бұл жердегі балалар "оқуларын" бітіргеннен кейін әскери дайындық үшін арнайы лагерьлерге жіберілетін көрінеді.

Сонымен қатар, террористер мектептегі кітапхананы жауып, оның сөрелеріне тек арнайы таңдалып алынған экстремистік мәндегі әдебиеттерді орналастырған. Бұдан бұрынғы хабарларымызда, 1 маусым күні ресейлік әскерилердің Сүрияның Таллаф қаласынан «Хайят Тахрир әш-Шам» террорлық тобының жерасты базасын тапқаны туралы жазған едік. Сонымен қатар, БҰҰ-ға қарасты ЮНИСЕФ қорының таңбалары бар дәрі-дәрмек қоймасының да әшкереленгенін хабарлағанбыз. Енді террористерді дайындайтын осындай «оқу орындары» бар екендігі хабар тарағалы бері, халықаралық ұйымдар өздерінің алаңдаушылықтарын білдіруде.

 “The Qazaq Times”