Ауғанстан президенті Ашраф Гани. Фото: YouTube

Ауғанстан президенті Ашраф Гани «Талибан» қозғалысын саяси топ деп мойындауды қолдады – деп хабарлайды Tolo телеарнасы.

Tolo мәліметінше, Ашраф Гани журналистер алдында Талибан қозғалысына қатысты сөз сөйлеген. Онда ол: «Ауғанстан билігі Талибан қозғалысы мүшелері мен олардың отбасыларына төлқұжат береді. Қозғалыс көшбасшыларына салынған санкцияларды алып тастайды. Біз бейбіт келісімге келуде Талибан қозғалысының айтқандарымен санасатын боламыз», - деген.

Естеріңізге салайық, бұған дейін Талибан қозғалысы АҚШ-ты 17 жылға созылған соғысты тоқтатып, келісімге келуге шақырған. Талибан қозғалысы таратқан мәлімдемеде: «Ауғанстан Ислам әмірлігінің саяси бюросы АҚШ шенеуніктерін Ауғанстан мәселесін реттеуде тек Ислам әмірлігімен ғана келіссөздер жүргізуге шақырады. Егер АҚШ Ауғанстан халқының заңды талаптарын орындап, Ислам әмірлігімен бейбіт келіссөздер жүргізетін болса, онда ол мәселенің шешілуіне септігін тигізеді» - делінген.

“The Qazaq Times”