Фото: Vласть

2017 жылдың қаңтар-мамыр айында төленген салық есебінен Қазақстанның мемлекеттік бюджетіне 2,8 трлн теңге түскен. Өткен жылдың есептік кезеңімен салыстырғанда жинақ көлемі 14%-ға өскен.

Жылдық жоспар 42%-ға орындалса, осы жылдың жоспары 5,3%-ға артық орындалған. Сондай-ақ, табыс салығы - 986 млрд теңге (+6%), ішкі салық 991 млрд теңге (+18%), халықаралық саудаға салынған салық 443 млрд теңге (+27%), әлеуметтік салық — 230,4 млрд теңге (+11,3%), жекеменшік салық — 138,3 млрд теңге (+17,5%) болды. Мұндай мәліметті  ranking.kz агенттігі келтіріп отыр.

Жалпы салық түсімдеріндегі екінші деңгейлі банктердің үлесі 3%-ды құрайды. Қазақстандағы 36 банктің 21-і ірі көлемде салық төлеуші банктер қатарында.

Сонымен осы жылдың 5 айында екінші деңгейлі банктер бюджетке 96 млрд теңге төлеген. Төленген салықтың ең көп бөлігі яғни 55%-ы Qazkom-ға тиесілі, 28,8 млрд теңге салық төлеген. Ал Халық банктің төлеген салығының көлемі 24,2 млрд теңгені құрады.

Сондай-ақ, көп салық төлеген банктердің бестігіне Цеснабанк кірді. Аталған банк осы жылдың 5 айында 6,3 млрд теңгеге салық төлеген. ЦентрКредит 3,6 млрд теңге, Хоум Кредит 3,5 млрд теңге төлепті.

Дегенмен Ұлттық банктің екінші деңгейлі банктерді сауықтыру үшін 500 млрд теңге көлемінде қаржы жұмсайтынын ескерсек, қаржы институттарының төлеген салығы еш пайдасыз екенін байқауға болады.