Көрнекі сурет. https://kyodonews.net

Ресей әскерлерінің Курил аралдары маңында (Кунашир) оқу-жаттығу ұйымдастырғанына қатысты Жапония билігі наразылық білдірді. Бұл туралы Токиода өткен баспасөз конференциясында министрлер кабинетінің бас хатшысы Ёсихидэ Суга хабарлады.

Мәлімдемеде: «Бұл жағдай Жапонияға да қатысты болғандықтан, біздің тарап үнсіз отыра алмайды. Сол себепті Ресейдің Кунашир маңында әскери оқу-жаттығу өткізуіне наразылық білдіреміз», – деді Ёсихидэ Суга.

Жапонияның бұл мәлімдемесіне Ресей тарабы: «5-10 тамыз аралығында Кунаширде әскери жаттығу өткізуге толықтай құқығымыз бар. Ал Токионың наразылығын негізсіз деп санаймыз» – деп мәлімдеді.

2 тамызда Курил аралдарына ресейлік шенділер басқару тобымен барғаннан кейін, Жапония Сыртқы істер министрлігі Мәскеуге наразылық хатын жолдаған болатын. Бұған қатысты пікір білдірген Ресей премьер-министрі Дмитрий Медведев: «Жапон халқының наразылығы біздің еш алаңдаушылығымызды туғызбайды. Курил аралдары Ресей жеріне тиесілі. Аралдар Сахалин облысына кіреді. Сол себепті ресейліктердің ол жаққа баруға толықтай құқығы бар», – деп жауап берді.

Жалпы алғанда, екі ел арасындағы арал дауы әлі күнге дейін оңтайлы шешім тапқан жоқ. Жапония премьер-министрі Синдзо Абэ мен Ресей президенті Владимир Путин осы мәселеге қатысты 2012 жылдан бері бірнеше рет кездесу ұйымдастырған. Бірақ, тараптар ортақ мәмілеге келе алмады.

"The Qazaq Times"