Фото: https://primeminister.kz

Қазақстан мен Венгрия инвестициялық ынтымақтастықты нығайтпақ. Бұл туралы ҚР премьер-министрі Асқар Маминнің Венгрия премьер-министрі Виктор Орбанмен кездесуінде мәлім болды

Кездесу барысында Үкімет басшылары экономикалық және сауда келісімін талқылап, алдағы уақыттағы жоспарларды талқылады. Сонымен қатар, дәстүрлі және баламалы энергетика, атом өнеркәсібі және ғылым, қорғаныс-өнеркәсібі кешені, авиация, ауыл шаруашылығы, қазақстандық экологиялық таза өнімді экспорттау салаларындағы өзара тиімді ынтымақтастықты тереңдету перспективалары қаралды

Асқар Мамин Қазақстан мен Венгрия арасындағы сенімді қарым-қатынастар экономикалық өзара іс-қимылды дамытуға қолайлы жағдай жасайтынын атап өтті. Өз сөзінде Виктор Орбан: «Біз Қазақстанды елеулі экономикалық нәтижелерге қол жеткізіп жатқан ел деп санаймыз. Екіжақты қарым-қатынас орнатқанымызға өте қуаныштымыз. Венгрия алдағы уақытта да Қазақстанға ашық болып, экономикалық ынтымақтастық мүмкіндіктерін іздеуді жалғастырады»,– деп мәлімдеді.

Айта кетейік, 29 сәуірде Нұр-Сұлтанда 100 мажар кәсіпкерінің қатысуымен Қазақстан – Венгрия Стратегиялық кеңесінің отырысы өтеді. Шарада сауда көлемін ұлғайту және инвестициялық ынтымақтастықты одан әрі дамыту мәселелері талқыланады.

"The Qazaq Times"