Иранның СІМ өкілі АҚШ санкциясын сынға алды. Фото: IRNA.

Иран Сыртқы істер министрілігінің ресми өкілі Бахрам Ғасеми АҚШ-тың Иранға қаратқан санкциясы туралы пікір білдіріп, бұл шараның ешқандай пайдасыз және нәтижесіз екенін айтқан. Бұл туралы IRNA ақпараттық агенттігі хабарлады. 

Бахрам Ғасемидің айтуынша АҚШ санкциясы Иранның экономикалық құрылымына айтарлықтай үлкен әсер ете қоймайды. Бұған Иранның өңірдегі маңызды стратегиялық орыны мен ықпалы себеп болатынын алға тартқан. Ол сөзінде: «Иран аймақтағы салмағы бар елдердің бірі және қазіргі кезде жаһандық қолдауға ие. Әлем елдерінің компаниялары АҚШ-тың қоқан-лоқысына қарамастан Иранмен ынтымақтастық орнатуға ынталы», – деді.

Иран лауазымдыларының айтуынша бұл текетірестегі жеңілуші АҚШ президенті болмақ екен. Алайда, қазіргі кезде Иранның ішкі әлеуметтік толқуы барған сайын күшейіп келеді. Үкімет лауазымдылары кезегімен мәлімдеме жасап, «Иран халқын кезекті қиыншылықтан да тыныштықпен өтуге» шақыруда.

“The Qazaq Times”