25 шілдеде тәжік-ауған шекарасында Душанбенің төрт жас тұрғыны Ауғанстанға заңсыз өтпек болған жерінен ұсталған. Бұл жөнінде Тәжікстанның есірткіге қарсы күрес агенттігінің өкілі хабарлады.

17-18 жастағы жас жігіттер Ауғанстанға өтіп, "Ислам мемлекеті" (ИМ) террористік тобына қосылмақ болғандарын мойындаған.

Ұсталған төрт жасөспірімнің төртеуі де Душанбе мектептерінің бірінде бірге оқыған. Есірткіге қарсы күрес агенттігінің өкілі Мухаббат Абдуллозоданың айтуынша, аталған жастар алдында да шекараға бірнеше рет келіп, Пяндж өзенінен қалай өту керектігін тексеріп кеткен.

Тәжікстан мен Ауғанстан арасындағы шекара қашықтығы - 1400 шақырым. Биыл көктемде Тәжікстан президенті Эмомали Рахмон "Ислам мемлекеті" құрамындағы ондаған тәжік содыры Сүрия және Ирактағы соғыстан жеңілістен кейін, Ауғанстанға өтіп кеткенін, олардың Тәжікстан жастарын тартуы мүмкін екенін айтып, қауіптенген.

“The Qazaq Times”