Түркия президенті Режеп Тайып Ердоған.

Режеп Тайып Ердоған: «Түркиядағы президент және парламент сайлауында демократия жеңіске жетті» - деп мәлімдеді.

Маусым айының 24-і күні өткен президент және парламент сайлауынан кейін Түркия басшысы Режеп Тайып Ердоған «Әділет және даму» партиясы ғимаратының балконынан ел халқына үндеу жасады. Ол онда: «Президент және парламент сайлауында демократия мен ұлт таңдауы жеңіске жетті. Біз ертеңнен бастап халыққа берген уәделерімізді орындауға кірісеміз. Біз президенттік басқару жүйесіне өтуге дайындықты аяқтадық. Президент әкімшілігі мен министрлер кабинеті толықтай жасақталды. Біз күндіз түні жұмыс істеп, бүкіл әлемге үлгі көрсететін боламыз» - деп мәлімдеді.

Естеріңізге салайық, маусым айының 24-і күні Түркияда президент және парламент сайлауы өткен. Президент сайлауында Режеп Тайып Ердоған халықтың 52 пайыз дауысын жинап жеңіске жеткен. Ал оның «Әділет және даму» партиясы сайлаушылардың 42 пайыз дауысын жинап, парламенттегі 293 орынға ие болған.

“The Qazaq Times”