Фото: China.org

Қырғызстанның экс-президенті Алмазбек Атамбаев Қытай басшысы Ши Жинпиңмен кездесті.

Қырғызстан социал-демократиялық партиясының баспасөз қызметі таратқан мәлімет бойынша, сәуір айының 11-і күні Алмазбек Атамбаев Қытайдың Боао қаласында Ши Жинпиңмен кездескен. Кездесу барысында екі ел басшылары «Бір белдеу – Бір жол» жобасы аясында екі жақтық қарым-қатынастың даму қарқыны жөнінде әңгімелескен. Бұдан бөлек Ши Жиңпиң Алмазбек Атамбаевты Қырғызстан социал-демократиялық партиясының төрағасы болып сайлануымен құттықтап, екі ел арасында достық қарым-қатынас орнатуға үлес қосқаны үшін алғыс білдірген. Ал өз кезегінде Алмазбек Атамбаев Ши Жинпиңге «Боао Орталық Азия» форумына шақырғаны үшін алғыс айтқан.

Естеріңізге салайық, наурыз айының 31-і күні өткен Қырғызстан социал-демократиялық партиясының құрылтайында Алмазбек Атамбаев партия төрағасы болып сайланған және құрылтайдан кейін өткізген баспасөз мәслихатында президент Сооронбай Жээнбековты қатаң сынға алған. Осыдан кейін көптеген сарапшылар "Атамбаев пен Жээнбеков арасында билік үшін талас жүріп жатыр" - деген болжам айтқан. Ал бұдан сәл ертеректе БАҚ беттерінде Қытай билігінің Қырғызстан социал-демократиялық партиясына 1 миллион сом көлемінде қаржы бергендігі жөнінде ақпарат тараған.

“The Qazaq Times”