АҚШ-тың Ресейдегі бас елшілігі. Фото: AFP.

АҚШ-тың ресейлік дипломаттарды елден шығару шешіміне Мәскеу тарабы да өз жауабын қайтаруда. Кеше кеште өткізілген баспасөз конференциясында, Ресей СІМ басшысы Сергей Лавров АҚШ-тың Петербордағы бас елшілігі де жабылуы мүмкін екенін айтты. Сонымен бірге, Ресейдің елден шығаратын америкалық дипломаттарының саны АҚШ-тан қуылған ресейлік дипломаттардың санымен бірдей болатынын да атап өтті. Бұл туралы VOA ақпараттық сайты хабарлады.

Ресей Сыртқы істер министрлігінің мәлімдемесінде, АҚШ-тың Мәскеудегі елшілігінен 58 дипломатты және Екатеринбург қаласындағы консулдықтан екі қызметкерді елден шығаратыны айтылған. Мәскеу шешіміне сәйкес бұлар Ресей аумағынан 5 сәуірге дейін кетіп болуы керек.

Ақ үй тарабы Кремльдің бұл қадамына пікір білдіріп: «Бұл күтілмеген іс емес, бірақ бұдан Құрама Штат емес Ресейдің өзі көбірек зардап шегеді. Ресей өзін құрбандық ретінде қарамай, бұл әрекеттермен өзін ақтап аламын деп ойламауы керек», – делінген.

Ресейдің тоңтеріс әрекетіне байланысты АҚШ тарабы уақытша қарсы шараларды тоқтата тұруы мүмкін деген болжамдар айтылуда.

 “The Qazaq Times”