Фото: xinhuanet.com

Солтүстік Корея басшысы Ким Жоң Ун Қытай басшысы Ши Жинпиңмен кездесті – деп хабарлайды Шиньхуа ақпарат агенттігі.

Агенттік мәліметінше, Ким Жоң Ун Қытайға 25 наурыз күні бейресми іс-сапармен барған. Ол іс-сапар барысында Қытай басшысы Ши Жинпиңмен кездесіп, оны мемлекет басшысы болып қайта сайлануымен құттықтаған. Бұдан бөлек екі ел басшылары екі жақтық қарым-қатынасты дамыту, аймақтық және халықаралық мәселелерді талқылаған. Кездесу барысында Ши Жинпиң: «Біз солтүстік кореялық жолдастарымыз бен  кездесуге қашан да дайынбыз және алға қарай даму үшін, аймақ тыныштығын қамтамасыз ету үшін әріптестік орнатуға ниеттіміз» - деген.

Естеріңізге салайық, бұған дейін БАҚ беттерінде Солтүстік Корея басшысы Ким Жоң Унның АҚШ президенті Дональд Трамппен кездесуге ниетті екендігі жөнінде ақпарат тараған. АҚШ пен Солтүстік Корея арасындағы қарым-қатынас Оңтүстік Кореяда өткен қысқы Олимпиада ойындарынан кейін жақсара түскен. Олимпиада ойындары кезінде КХДР басшысының қарындасы Ким Е Жоң Оңтүстік Корея президенті Мүн Жайнмен кездескен. Аталмыш кездесуден кейін Оңтүстік Корея өкілдері Солтүстік Кореяға ресми іс-сапармен барып, кейіннен АҚШ-қа сапарлаған.

“The Qazaq Times”