Ең төменгі күнкөріс деңгейінің шамасы төмендеді

Негізгі тамақ өнімдерін тұтынудың ең төменгі нормаларынан есептелетін, орта есеппен халықтың жан басына шаққандағы ең төменгі күнкөріс деңгейінің шамасы 2017 жылғы шілдеде өткен аймен салыстырғанда 2,7% төмендеген. Бұл туралы ҚР Ұлттық экономика министрлігінің баспасөз қызметі мәлімдеді.

Министрліктің мәліметінше, 2016 жылғы шілдемен салыстырғанда 10,4%-ға жоғарылаған. Оның құрылымында ет пен балықты сатып алуға жұмсалған шығыстардың үлесі 20,2%.

Оның ішінде сүт, май және тоң май өнімдері мен жұмыртқаға кеткен шығын – 15,4%, жемістер мен көкөністерге – 14,1%, нан және жарма өнімдеріне – 7,8%, қант, шай және дәмдеуіштерге кеткен шығын 2,5%-ды құрады.

	Орта есеппен халықтың жан басына шаққанда	0-13 жастағы балалар	14-17 жастағы жасөспірімдер		18 жастан асқан, еңбекке қабілетті халық		Зейнет-керлер мен қарт адамдар
			жас жігіттер	қыздар	ерлер	әйелдер
Күнкөрістің ең төменгі деңгейінің шамасы	24 447	19 383	30 865	23 653	29 165	23 156	22 910
Азық-түлік тауарлары	14 668	11 630	18 519	14 192	17 499	13 893	13 746
Азық-түлік емес тауарлар мен ақылы қызметтер	9 779	7 753	12 346	9 461	11 666	9 263	9 164

Дереккөз: ҚР ҰЭМ

Ең төменгі күнкөріс деңгейі – мөлшері бойынша ең төменгі тұтыну қоржынының құнына тең, бір адамға қажетті ең төменгі ақшалай табыс. Ең төменгі тұтыну қоржыны адамға қажетті тамақ өнімдерінің, тауарлар мен көрсетілетін қызметтердің заттай және құндық көріністегі ең төменгі жиынтығы.

Айта кетейік, күнкөріс деңгейінің төмендеуіне қарамастан Қазақстанда шілде айында көкөніс бағасы едәуір қымбаттаған. Мысалы сәбіздің килограмы 15,6%-ға немесе 153,8 теңгеге дейін көтерілсе, 7,5%-ға (орта есеппен 141,1 теңге) қызылша және бұршақтар - 1,2%-ға қымбаттаған.

“The Qazaq Times”