Фото: EnergyNews

Ресей Сүрияның Тартус портында әскери база құрады. Бұл туралы бүгін Итерфакс ақпарат агенттігіне Ресей Әскери-теңіз күштерінің бас штабының бұрынғы басшысы адмирал Виктор Кравченко мәлімдеді.

Кравченконың сөзінше, аталмыш база Ресей қарулы күштерінің Жерорта теңізі мен Таяу Шығыстағы ықпалын күшейтеді. Осы уақытқа дейін Тартус портында Ресейге тиесілі материалды-техникалық кешен жұмыс істеп келген. Осыдан былай бұл кешен кеңейтіліп, Ресей әскери-теңіз күштеріне тиесілі базаға айналмақ. Бүгін Ресей президенті Владимир Путин Тартус портындағы материалды-техникалық кешенді әскери база ретінде пайдалануға байланысты тиісті құжаттарды Мемлекеттік Думаға ратификациялауға жіберген.

Естеріңізге салайық, бұған дейін Владимир Путин Сүрияның Хемаймим әскери базасына сапары кезінде Ислам мемлекеті лаңкестік ұйымының талқандалғанын айтып, Сүрия аумағынан Ресей әскерін шығаруға бұйырық берген болатын.

“The Qazaq Times”