ШҚО-дағы індет жағдайы өршіп тұр. Фотоколлаж: ашық дереккөз

Ресми дерек бойынша, Қазақстанда 16 қараша 602 адамнан коронавирус, ал жексенбіде 23 адамнан коронавирус пневмониясы анықталды. Жаңа оқу жылы басталғалы бері мыңнан астам оқушыдан коронавирус табылған. Емделіп жатқан 19,5 мың қазақстандықтың хәлі қалай? 

#Коронавирус Кеше, қарашаның 16-сы коронавирус жұқтырған 438 адам айығып шықса, 7 адам өмірден өткен. Жаңадан тіркелген науқастардың ең көбі –  ШҚО (221) және СҚО (61), Қостанай (57), Павлодар облысы (50), Алматы қаласы (36), астана мен Ақмола облысында (әрқайсында 33-тен). Маңғыстау облысында  ешқандай науқас анықталмаған.

Бір айға жуық науқастар саны бойынша алда келе жатқан Шығыс Қазақстан облысындағы эпидемиялық ахуал ушығып, өңір толықтай оқшауланған. Дегенмен мемлекеттік бас санитар Ерлан Қиясов өңірдегі «жағдай бақылауда және қалыпты» деп санайды. Оның айтуынша, бұл шектеу шараларының нәтижесі, егер карантин енгізілмегенде кемі 2-3 есеге жоғары болуы ықтимал көрінеді. Өңір (13 мың) вирус жұқтырғандар бойынша Алматы қаласы (15 мың) мен астанадан (15 мың) кейінгі үштікте тұр. Жергілікті атқарушы билік өкілдері мұның себебін санитарлық талаптардың тиісінше сақталмауымен және шекаралық аймақ болуымен байланыстырады. Халқы жағынан өзге аймақтарға қарағанда айтарлықтай аз ШҚО-дағы жұқтырғандар саны қараша айы басталғалы 3876-ға өсті.

Екінші қатарда Павлодар (812), кейін Қостанай (730) облыстары орналасқан. Әзірге жағдай тұрақты өңірлер – Қызылорда (7), Маңғыстау (13), Түркістан (26) облыстары. Мұның барлығы қараша айындағы ресми жиынтық есеп бойынша. Шынтуайтында қалай екені белгісіз. Себебі коронавирустан бөлек "жұмбағы шешілмеген" коронавирус пневмониясының аймақтарға таралу көрсеткіші күнделікті берілмейді. Айына үш мәрте ғана.

Эпидемия жағдайының деңгейіне байланысты Павлодар, Қостанай, Шығыс және Батыс облыстары қызыл, астана, Алматы қаласы мен Ақмола облысы сары, қалған өңірлер жасыл аумаққа жататыны хабарланды.

ДенМин-нің ресми мәліметінше, емделіп жатқан 9319 науқастың 3126-сы ауруханада. Тағы 6193 адам амбулаторлық терапияда. Олардың арасында 456 бала емделіп жатыр.

Ахуалы нашар 220 науқастың арасында 21 адамның жағдайы қатты қиындаған. Және 23 сырқат өкпені жасанды желдету аппаратымен тыныстап жатыр.

Республика бойынша барлығы 121 мыңнан астам адам коронавирус инфекциясын жұқтырса, емделіп жазылғандары – 110 мыңнан асқан. Бұл жалпы науқастардың 95%-дан астамы. Қазан айының алғашқы аптасынан бастап елде коронавирус қайта көбейген.

#Коронавирус_пневмониясы Сонымен қоса, коронавирус пневмониясына шалдыққан 23 адам тіркелген. Тағы 54 адам айығып шыққан, бір адам өмірден өткен. Бірақ олардың қаншасы қай аймақтан екені белгісіз. ПТР тесті теріс қорытынды көрсеткенімен, коронавирус салдарынан қабынған ақөкпе ауруының аймақтарға таралу дерегін тұрақты түрде жариялауға уәде еткен министр Алексей Цой да, оның көмекшісі, ведомствоның сол кездегі ресми өкілі Бағдат Қожахметов те сөзін бұрмалап, әр он күн сайын жариялауға көшкен. Коронавирус пневмониясының өңірлердегі күнделікті динамикасы белгісіз. Пневмонияға шалдыққан 40 мың адамның 29,5 мыңы жазылып шыққан. Кейбір дереккөздерге, анығырақ айтқанда ДенМин өкілінің айтуына қарағанда, дүйсенбі және сейсенбі күндері демалыс күнгі, яғни сенбі мен жексенбідегі мәлімет беріледі. Коронавирус жағдайын өткен тәуліктің ертеңіне жүйелеп жариялау жолға қойылғанымен, коронавирус пневмониясы туралы мәлімет екі күнге кешігіп жинақталады. Дүйсенбі дерегі сәрсенбіде бір-ақ беріледі. Сондықтан «өткен күні» деп жазылатын ресми ақпарат күмәнді. Екі күн кешіксе де ведомствоның баспасөз қызметі «өткен күнгі» дерек деп жариялайды. Апта сайын екі күнгі көрсеткіш төмендеп сала береді. Министрлік мұны медицина ұйымдары мен ведомствода демалыс күні болуымен түсіндіреді. ДДСҰ туыстас дерттің қаупі бірдей екеніне баса назар аударса да Қазақстанның Денсаулық сақтау министрлігі коронавирус пен оның пневмониялық түріне екі түрлі көзқараспен қарайды. Оның анық дәлелі – КВИ+ туралы ақпараттық индикаторлар (аймақтарға таралуы, науқастардың ахуалы, оның ішіндегі стационар мен амбулаторлық бақылаудағылар саны, балалар саны, ӨЖЖА-мен тыныстап жатқандар, айыққандар, жаңа кейстер, қайтқандар) күнделікті жарияланса, ал КВИ- дерегі соңғы үш көрсеткіштен өзге мәлімет берілмейді. Ал коронавирус пневмониясының аймақтарға таралуы жөніндегі дерегі министр о баста айтқандай күнделікті не аптасына емес, енді он күнде бір-ақ берілетін болды. Оның өзінде құжат форматында сайтқа жүктеп отырады, ведомство сайтында ашық әрі түсінікті тілде талдап жарияламайды.

Қоғамда биылғы 256 мың пневмония жағдайын есепке қоспай, жалпы статистиканы шілдедегі қырғыннан кейін жүргізе бастаған Үкіметтің есебіне күмәнмен қарайтындар көбейген.

#Сөйтсе... Қазақстанда коронавирус өлімі азаймай тұр. Қараша айының алғашқы жартысында 11 493 адам ауырған (9235 адам КВИ+, 2258 адам КВИ-) және 119 адам қайтыс болған (100 адам КВИ+, 19 адам КВИ-). Бұл қазан айында тіркелген толық жиынтықтан да көп. Ресми дерекке сәйкес, өткен қазан айында 9,5 мыңдай қазақстандық ауырды: коронавирус жұқтырған 4439 адам анықталып, 118 адам қайтыс болған. Дәл осы уақытта коронавирус пневмониясына 4984 адам шалдығып, 47 адам қайтқан.

Осылайша жазғы толқынның шарықтау шегінен кейінгі тамыз айынан бері Қазақстанда коронавирус жұқтырғандар 30 мыңнан, ал коронавирус пневмониясына шалдыққандар 40 мыңнан асқан. Екеуін қоса есептегенде, кейінгі үш жарым айда індеттен 1,3 мыңдай адам өмірден өткен.

Қазіргі таңда 19,5 мыңға жуық (КВИ+ 9319, КВИ- 10 165) адам ауырып жатыр.

Пневмонияның коронавирустан басқа түрлеріне шалдыққандар саны 358 мыңға жақындады. Жиынтық есебі, 13 наурыздан бері COVID-19 инфекциясын жұқтырғандар қатары 121 мыңнан, 1 тамыздан бергі коронавирус пневмониясы 40 мыңнан асқан. ДДСҰ мәліметінше, Қазақстанда ауырғандардың саны 161 мыңға жеткен. Дегенмен Үкімет коронавирус пен оның пневмониясын екі бөлек есептейді. Пандемия басталғалы жалпы вирус жұққандардың 3082-сі (КВИ+ / U07.1 – 1952, КВИ- / U07.2 – 421, ілеспе аурулардан – 709) қайтыс болған. Алайда Қазақстан билігі бойынан коронавирус табылса да, басқа аурулардың себебінен қайтыс болды делінген 709 адамды жалпы статистикаға қосып есептемейді. Сарапшылар бұған қарсы. Олардың айтуынша, коронавирустың жанама әсерінен қайтқандардың жартысынан астамының себебі қан айналымы жүйесінің аурулары болғандықтан, оған инфекция дерт қоздырушы фактор ретінде өлімге әкеп соқтырған.

"The Qazaq Times"