АҚШ президенті мен вице президенті. Фото: NBC.

АҚШ вице-президенті Майк Пенс Қытайды Американың ішкі саясатына араласып отыр деп айыптады.

Хадсон институтында сөз сөйлеген Майк Пенс АҚШ-тың Ресей және Қытаймен қарым-қатынасына тоқтала келе: «Қытай президент Трамптың енгізген санкцияларына жауап ретінде Републикалық партия жұмысына кедергі келтіріп, АҚШ-тың ішкі саясатына араласуда. Бірде маған барлау қызметіндегі жоғары лауазымды бір азамат айтқан еді. Қытайдың ел бойынша АҚШ-қа жасап отырғанын Ресеймен салыстыруға келмейді» - деп мәлімдеген.

Майк Пенстың аталмыш мәлімдемесінен кейін Қытай СІМ ресми өкілі Хуа Чуньин: «Майк Пенстың сөздері шындыққа жанаспайды. Ол өзінің осы мәлімдемесі арқылы Қытай еліне жала жауып отыр» - деп жауап берген.

Жалпы, билік басына Дональд Трамп келгелі бері АҚШ пен Қытай қарым-қатынасы бұрынғы жылдармен салыстырғанда ушыға түскен. Қазіргі таңда екі ел арасында сауда соғысы жүріп жатыр. Ресми Уашингтон мен Бейжің бір-біріне қарсы кезек-кезек санкциялар енгізуде.

"The Qazaq Times"