Өзбекстан сыртқы істер министрі Абдулазиз Камилов: «Біз АҚШ-қа ақталу үшін келген жоқпыз» - деп мәлімдеді.

Абдулазиз Камилов бастаған Өзбекстан делегациясы шілде айының 25-і күні Уашингтонда «Өзбекстандағы діни бостандықтың жаңа эрасы» атты баспасөз мәслихатын өткізді. Онда Абдулазиз Камилов журналистердің «Өзбекстан үшін АҚШ астанасында діни бостандық жөнінде мәлімдеме жасау маңызды ма?» деген сұрақтарына: «Біздің АҚШ-пен қарым-қатынасымыз кеше ғана басталған жоқ. Күн тәртібінде діни бостандық тақырыбы тұр. Бұл тақырыбтың Өзбекстан мен АҚШ қарым-қатынасында алатын орны ерекше. Себебі бұл адам құқығы, бейбітшілік және таңдау құқығымен тікелей байланысты. Кейде Өзбекстанға қатысты түрлі сыни мәлімдемелер жасалады. Бірақ біз АҚШ-қа оны жоққа шығарып, ақталу үшін келген жоқпыз. Біз тәжірибе алмасу арқылы алда тұрған мәселелерді бірлесіп шешу үшін келдік» - деп жауап берген.

Естеріңізге салайық, Өзбекстан сыртқы істер министрі Абдулазиз Камилов 24 шілде күні АҚШ-қа ресми іссапармен барған. Онда ол діни бостандық тақырыбы бойынша министрліктер арасындағы халықаралық конференцияға қатысқан және Уашингтонда бірқатар екі жақтық кездесулер өткізген.

“The Qazaq Times”