Жылдам таралатын жаңа штам алаңдатып отыр. Фото: Звезда

Бір күн бұрын Дүниежүзілік денсаулық сақтау ұйымы (ДДСҰ) коронавирустың жаңа штамы «Омикронның» таралуына қатысты жаңа мәлімдеме жасап, көптеген елдерде вирус жұқтырғандар саны рекордтық көрсеткішге жетуі мүмкін екенін айтты.

Еуропа жаңа жылға қарсы шектеу шараларын күшейтіп жатыр. Қытай өзінің осыған дейін қолданып келген қатаң карантиндік шарттарын қайта енгізді. Кейбір қалалары толықтай карантинге жабылды. Солтүстік және Латын Америкасындағы үкіметтер азаматтарына дабыл қағып, «омикронның» таралуынан сақ  болуды ескертіп жатыр.

ДДСҰ мәлімдемесінде айтылғандай, қазірге дейінгі әлем елдеріндегі пандемияға қарсы күрес тәжірибелері біршама жалпыласып қалғандықтан, «омикрон» штамының қаупі төмен болуы мүмкін. Алайда, көптеген елдің денсаулық сақтау жүйесіне ауыр салмақ түсіреді деп ескертті. Жылдам таралатын бұл вирус қазірге дейін әлемнің жүзге жуық елінен табылды.