Балалар қалалық клиникалық жұқпалы аурулар ауруханасының модульді филиалында анасымен бірге коронавирустан емделіп жатқан балалардың бірі. 21 қыркүйек 2021 жыл. Алматы қаласы. Фото: QT / Күлтегін Аспанұлы

Қазақстанда коронавирус пен оған ұқсас пневмонияға шалдыққандар саны тағы 2 мыңға артып, жалпы есебі 977 мыңға жеткен. Қазан айының алғашқы аптасында 14 мың науқас анықталып, 340 адам көз жұмған. Бұл салыстырмалы түрде былтырғыдан айтарлықтай жоғары. ПТР тесті арқылы коронавирус жұққаны расталған сырқаттар қатары 900 мыңнан асты.

Денсаулық сақтау министрлігінің ресми мәліметінше, елде 7 қазанда коронавирус (КВИ+) жұққан 1896 адам, ал 6-сы күні  коронавирус пневмониясына (КВИ-) шалдыққан 187 адам тіркелді. Сондай-ақ, өткен сәрсенбіде 43 қазақстандық аурудан қайтыс болды. Осылайша осы аптадағы жағдай маусым айының соңындағы деңгейге шамалас көрінеді. Дегенмен былтыр дәл осы уақытта ресми статистикада тәулігіне көп дегенде 300-ге дейін науқас және 10-ға жетер-жетпес өлім жағдайы тіркелетін, стационарларда жатқан сырқаттар саны 3,5 мыңнан аспаған еді. Қазір бұл көрсеткіш еселеп өсіп отыр, бүгінде елде 55 мыңға тарта адам (КВИ+ бойынша 47 мың, КВИ- бойынша 7 мың) ауырып жатыр.

#COVID Өткен күні ПТР тесті арқылы коронавирус жұққаны расталған науқастар қатары тағы артты. Олардың басым бөлігі немесе 21%-ы әдеттегідей жоғары динамикада тұрған бір ғана Алматы (412) қаласына тиесілі. Ал астана (297), Алматы (174), Қарағанды (157), Павлодар (153), ШҚО (125), СҚО (118), Қостанай (96), Шымкент (55), БҚО (53), Ақтөбе (51), Ақмола (43), Жамбыл (41), Түркістан (38), Қызылорда (36), Атырау (35), Маңғыстау (12) өңірлерінде біршама тұрақты. Бейсенбіде аурудан айыққан 2804 адам үйіне шығарылған. 6 қазанда жиыны 37 адам қайтыс болған.

#COVID_пневмониясы Қазанның 6-сы ақпараты бір тәулікке кешігіп берілетін коронавирус пневмониясына шалдыққан 187 науқас есепке алынды. Ведомство дерегінше, бұл күні Ақмола (36), Алматы облысы (30),  Жамбыл (21), Шымкент (16), ШҚО (15), астанада (10) сырқаттар көптеп анықталған. Сонымен қоса, 342 адам айығып шыққан, тағы 6 адам көз жұмған.

#Жалпы  ДенМин дерегіне қарағанда, емделіп жатқан 55 мыңдай науқастың 9,4 мыңы ауруханада, 45 мыңы амбулаторлық бақылауда. 717 науқастың жағдайы нашар, ондағы 207 адамның хәлі өте ауыр. Бұдан өзге 136 сырқат өкпені жасанды желдету аппаратымен тыныстап жатыр.

Эпидкартада «жасыл аймақтағы» Түркістан, Маңғыстау, Қызылорда, Атырау және Жамбыл облыстарынан басқа Шымкент, Ақтөбе, БҚО, ШҚО, Қостанай, Қарағанды, Алматы облыстары «сары аймаққа» өткен. Басқа 5 аймақ тұтастай «қызыл аймақта» тұр.

ДенМиннің QT редакциясына берген мәліметінше, 11 наурыз бен 12 шілде аралығында ПТР тесті оң көрсеткен 1311 сынама секвенирленген (штамм түрін анықтайтын талдау). Сәйкесінше, биыл көктем-жазда геномдық зерттеу нәтижесінде елдің басым бөлігінен вирустың бразилиялық, британдық, оңтүстікафрикалық, үндістандық және нигериялық штамдары анықталған.

Биылғы жаз мезгілі қазақстандықтар үшін қаралы хабарға толы болды. Пандемия басталғалы 1,5 жылдың ішінде анықталған барлық аурушаңдық пен өлім жағдайының жартысы тек өткен жазда, төртінші толқында тіркелді. Жазғы үш айда бас-аяғы 420 мың адам ауырса, 6,6 мыңнан аса адам көз жұмды. Қыркүйек айының өзінде 99 мыңдай науқас есепке алынған және 2117 адам қайтыс болған.

Былтыр 13 наурыздан бері COVID-19 инфекциясын жұқтырғандар қатары 900 мыңнан асса, 1 тамыздан бергі коронавирус пневмониясы 77 мыңға жуықтаған. ДДСҰ дерекқоры мен Ұлттық статистикада Қазақстанда ауырғандар саны 977 мыңға жетті. Дегенмен Үкімет коронавирус пен оның пневмониясын екі бөлек есептейді.

Пандемия басталғалы жалпы вирус жұққандардан 19,4 мың адам (КВИ+ / U07.1 – 11 459, КВИ- / U07.2 – 4887, ілеспе аурулардан – 3123) қайтыс болған. Алайда Қазақстан билігі бойынан коронавирус табылса да, басқа аурулардың себебінен қайтыс болды делінгендерді жалпы статистикаға енгізбейді. Бұған қарсы сарапшылардың сөзіне қарағанда, коронавирустың жанама әсерінен қайтқандардың жартысынан астамының себебі қан айналымы жүйесінің аурулары болғандықтан, оған инфекция дерт қоздырушы фактор ретінде өлімге әкеп соқтырған.

Қазақстан вирус таралуы бойынша әлемде Джонс Хопкинс университеті және ДДСҰ тізіміндегі 221 ел мен аймақтың арасында 37-орынға орнықты.

Үкіметтің соңғы дерегіне қарағанда, Қазақстанда 6,8 млн адам коронавирусқа қарсы вакцинаны толық алған, ал кемінде бірінші дозасы егілген жұрттың саны 7,8 млн-нан асады.

The Qazaq Times