Қырғызстан президенті Садыр Жапаров ел бюджетін үнемдеу мақчатында «Мемлекеттік аппарат санын қысқарту туралы» Жарлыққа қол қойды. 

Конституцияның 71-бабына сәйкес енді мемлекеттік органдардың штаттық саны 30%-ға қысқарады. Жапаров ел бюджетін үнемдеп, кадрлық тағайындауда саннан сапаға көшу керектігін айтты.

Ресми хабарламада: «Мемлекеттік атқарушы билік және басқару органдары құрылымын оңтайландыру, қосарлаушы және артық функцияларды жою, сондай-ақ мемлекеттік аппаратты ұстауға қарастырылған бюджет қаражатын үнемдеу мақсатында, Қырғызстан Республикасы Конституциясының 71-бабын басшылыққа ала отырып, Қырғызстан Республикасы Президенті әкімшілігі, министрліктер, мемлекеттік комитеттер, әкімшілік ведомстволар, атқарушы биліктің өзге мемлекеттік органдары, жергілікті мемлекеттік әкімшіліктер, мемлекеттік органдардың штаттық санын 30%-ға қысқарту қаулы етілді», – делінген.

Жарлық бойынша Қырғыз Республикасының Министрлер кабинеті:

– қысқартылған қызметкерлерге Қырғыз Республикасының заңнамасына сәйкес жұмыстан босату төлемін төлеуді қамтамасыз ету;

– қызметкерлерді кәсіпкерлік қызмет негізінде оқыту бойынша қажетті шаралар қабылдау;

– үнемделген қаражатты үкімет пен жергілікті өзін-өзі басқару органдарының қызметкерлерінің жалақысын көтеруге бағыттау тапсырылған.

Жарлық ресми жарияланған күнінен бастап күшіне енеді.

"The Qazaq Times"