Гурбангулы Бердімұхамедов. Фото: ВВС

Азық-түлік тапшылығы қысып, валютасы құнсызданған Түркіменстанда мейрамдар саны артты. Жақында қойылған алабайдың алтын мүсінінен кейін «Алабай күні» атты жаңа мереке пайда болды.

Бұл мереке Түркіменстан өзінің ұлттық қазынасы деп санайтын Ақал-теке жылқыларының мерекесімен бір күнде атап өтіледі.

25 сәуір Ашхабадта алабай тұқымды иттер арасында конкурс өткізілді. Жеңімпазды президент Гурбангулы Бердімұхамедов пен оның ұлы Сердар марапаттады. Олар медальді ит пен оның иесіне тапсырған.

Бұған дейін Түркіменстанды 2007 жылдан бері басқарып келе жатқан 63 жастағы Бердімұхамедов алабайлар туралы 272 беттен тұратын кітап жазған. Ал 2017 жылы Бердімұхамедов Ресей президенті Владимир Путиннің туған күніне күшік сыйлаған.

Қазір Түркіменстанда валюта құнсызданып, халықтың жағдайы нашарлады. 1 сәуірде Түркіменстан валютасы құнсызданып, «қара базарда» 1 доллардың құны 40 манатқа жетті. Бұл мемлекетте бірнеше жыл бұрын бекітілген ресми бағамнан 11 есе жоғары. 2015 жылы қаңтарда үкімет 1 доллардың бағамын 2,85 манаттан 3,5 манатқа көтерген.

"The Qazaq Times"