Жапонияда коронавирустың британиялық штамын жұқтырудың жаңа дерегі тіркелді.

Вирусты Сайтама мен Токио қаласында тұратын 40 пен 60 жас аралығындағы 5 адам жұқтырып алған. Науқастардың барлығы анықтала салысымен ауруханаға жеткізілген. Күншығыс елінде британиялық штамм алғаш рет өткен жылдың желтоқсан айында тіркелген болатын. Қазір Жапонияда британиялық штамды жұқтырғандар саны 64-ке жеткен.

Желтоқсанның аяғында Ұлыбританияда шыққан коронавирустың өзгерген жаңа түрі Нидерланд, Дания және Австралияда да тіркелді.

Мәліметтер бойынша, вирустың жаңа штамы адамдар арасында 70%-ға тез тарайды. Бірақ қауіптілігі жағынан бұрынғы түрінен ерекшеленбейді. Вирустың басқа мутациясының табылғанын Оңтүстік Африка Республикасының Денсаулық сақтау министрлігі де хабарлады. Оның да таралу қарқыны жоғары.

20 желтоқсанда Ұлыбритания Англияның оңтүстік-батысы мен Лондонда төртінші деңгейлі локдаун енгізген. Қатаңдатылған карантин кезінде Рождество мерекесіне байланысты қоғамдық іс-шараларға рұқсат жоқ. Мейрамханалар мен дәмханалар ашылмайды. Тұрғындарға үйден себепсіз шығуға тыйым салынған.

"The Qazaq Times"