Қордайдағы сарбаздар. Фото: Polisia.kz

Қордай ауданында болған бүліктен 19 полицей жарақат алыпты. Оның 9-ы атыс кезінде мертіккен. 

ІІМ-нің Polisia.kz ақпараттық медиа порталында жарияланған дерек бойынша, арнайы жасақ инспекторының беті мен сол аяғына оқ тисе, тағы біреуіне аяқ сан тұсынан жараланған. Қордай ауданында тәртіп орнатуға Жамбыл және Алматы облысы полиция департаменттерінің қызметкерлері жұмылдырылған. Полиция қызметкерлері қорғаныс құралдарының арқасында аса көп жарақат ала қоймаған көрінеді.  Диагнозы жеңіл сарбаздар медициналық көмекке жүгініп, ем-дом алған соң, қайтадан қатарға қосылыпты.  Алайда оқ тигендер арасында Алматы облысы ПД бастығының орынбасары Серік Жүнісбеков те бар. Оған арнайы ота жасалған, қазіргі таңда денсаулығына қауіп төніп тұрған жоқ. Қылмыстық кодекстің 380-бабы, яғни "Билік өкіліне қатысты күш қолдану" бойынша сотқа дейінгі тергеу жүргізілуде.

“The Qazaq Times”