ҚМ мәліметі бойынша Арыстағы әскери арсеналдың 70%-ы өртенген. Қару-жарақ қоймасында кем дегенде 40-50 мәрте жарылыс болған. 24 маусым 2019 жыл. Фото: Азаттық/Reuters

Қазақстан ІІМ 23 тамызда Арыс қаласының арсеналындағы жарылыс фактісі бойынша әскери бөлімнің командирі мен оның орынбасары қамауға алынғанын хабарлады. Аталған дерек бойынша қазір қылмыстық іс қозғалып, сотқа дейінгі тергеу амалдары жүргізілуде.

Осыдан екі ай бұрын қаланың іргесіндегі қару-жарақ қоймасында орын алған алапат жарылыстан кейін елу мыңға тарта тұрғыны бар Арыс қаласының көп бөлігі бүлініп, азаматтар үйлерін тастап қашуға мәжбүр болған. Жарылыстан 2 әскери, 1 бейбіт тұрғын, бейресми эвакуация кезінде көлік қаққан 1 бала көз жұмған. Жүзден астам тұрғын ауруханаға жеткізілген.

Бөлім командирінің орынбасары оқ-дәрі қоймасын да басқарғаны анықталды. 23 тамыз Арыс аудандық соты әскерилерді екі айға қамауға алған.Ұсталған екі әскери Қылмыстық кодекстің 462-бабы 3-бөлігінде қарастырылған «Қару-жарақпен, сондай-ақ айналадағыларға қауiп төндіретін заттармен және нәрселермен жұмыс істеу қағидаларын бұзу» және 453-бабы 2-бөлігі «Қызметке салғырт қарау» баптарымен күдікке ілінген.

Үкімет 1 тамызға дейін жөндеу жұмыстары аяқталады дегенімен қалада әлі күнге дейін құрылыс жалғасып жатыр.

Арыс қаласының іргесінде орналасқан арсеналдың жарылысқа дейінгі нысандық суреті. Фото: Азаттық/Reuters

"The Qazaq Times"