Трамп АҚШ әскерін Ауғанстаннан 2020 жылы шығаратын болды.

Шілде айының 29-ы күні АҚШ Мемлекеттік хатшысы Майк Помпео Уашингтонда өткен экономикалық клуб отырысында Ауғанстанға байланысты мәлімдеме жасады. Оның сөзінше, Дональд Трамп АҚШ әскерін Ауғанстаннан 2020 жылы өтетін президент сайлауына дейін шығарады.

«Дональд Трамп ұзақ жылғы соғысты аяқтауға ниетті екендігін нақты көрсетті. Біз Талибан қозғалысымен келіссөздер жүргізуде айтарлықтай жетістіктерге қол жеткіздік. 2020 жылдың қыркүйегінде 18 жылға созылған соғысты аяқтаймыз деп үміттенемін» - деді Помпео.

АҚШ әскері Ауғанстанға 2001 жылы кіргізілген. Қазіргі таңда олардың саны 14 мың. 2018 жылдың шілде айынан бері Уашингтон Ауғанстанда бейбітшілік орнатуға байланысты Талибан қозғалысымен келіссөздер жүргізуде.

Бұған дейін Дональд Трамп «егер АҚШ қаласа, Ауғанстанды он күнде жер бетінен жойып жібереді» деп мәлімдеген.

"The Qazaq Times"