Түркіменстан президенті Құрбанғұлы Бердімұхамедовті қайтыс болды деп жалған хабар таратқандарды жаппай ұстау басталып, ел полициясы күшейтілген тәртіпке көшті.

«Түркіменстан хроникасы» сайтының хабарлауынша, қазіргі уақытта үш адам ұсталған. Енді «Түркіменбашы тірі емес, қайтыс болды» деген жалған ақпарат тарату – «елдегі жағдайды тұрақсыздандыру» деп бағаланады.

21 шілдеде 62 жастағы түркімен басшысы Құрбанғұлы Бердімұхамедовтың өмірден озғандығы жөніндегі ақпарат жұрт назарын өзіне аудартты. Түркіменстан саясаттанушысы Аслан Рубаев «Говорит Москва» радиосына берген сұхбатында Түркіменстан президентінің көз жұмғандығы жөнінде айтқан. Осыдан кейін әлеуметтік желілер мен БАҚ беттерінде Құрбанғұлы Бердімұхамедовтың жұмбақ жағдайда қайтыс болғандығы жөнінде ақпараттар тарай бастаған. Кейіннен Түркіменстан дипломаттары бұл ақпараттардың шындыққа жанаспайтындығын айтып, мәлемдеме жасады.

24 шілдеде 9 күндік демалыста болған Түркіменстан президенті Құрбанғұлы Бердімұхамедовты мемлекеттік телеарналар көрсетті. Бұл – қайтыс болды деген сыбыстан кейін яғни 20 шілдеден кейін Бердімұхамедовтің бұқаралық ақпарат құралдарында алғаш төбе көрсетуі.

"The Qazaq Times"