Қазақстан мен Беларусь Қырым тауарларын сатып алудан бас тартуда.

Ресей сауда-өнеркәсіп палатасының басшысы Сергей Катырин Қазақстан мен Беларуське қатысты мәлімдеме жасады.

«Қырым кәсіпорындарына өз өнімдерін экспортқа шығару қиынға соғуда. Тұрақсыз геосаяси жағдайларға байланысты көптеген елдер «Қырымда жасалған» маркасымен шыққан өнімдерді сатып алуға құлықсыз. Оның ішінде Қазақстан мен Беларусь аталмыш өнімдерді сатып алудан бас тартуда» - деді Катырин РИА Новости басылымына берген сұхбатында.

Қазақстан мен Беларусь осы уақытқа дейін Ресейдің Қырымды аннексиялауын мойындаған жоқ. Бұған дейін Кремльге жақын Ресейдің бірқатар Федералды телеарналары Қазақстан мен Беларусьтың бұл әрекеттерін қатаң сынап, ресми Ақ орда мен Минскіге түрлі ақпараттық шабуылдар жасаған.

"The Qazaq Times"