Фото: www.kramola.info

АҚШ шетелдік пропагандадан қорғану мақсатында ғаламдық өзара іс-қимыл орталығына 45 миллион доллар қаражат бөлді.

2017 жылдан бастап Ресейдің саяси ықпалына қарсы күрес жүргізе бастаған орталық жалпы әлемдік ақпараттық қауіптен сақтануды қолға алмақ. Америка Мемлекеттік департаменті баспасөз хатшысы Роберт Палладиноның хабарлауынша, ғаламдық өзара іс-қимыл орталығына бөлінген қаражат Қытай, Ресей, Иран, Сүрия сынды мемлекеттердің ақпараттық соғысынан қорғануға арналған. Сондай-ақ шетелдік аудиторияның ақ-қарасын ажыратып, үгіт-насихаттан сақтандыру арқылы ақпараттық технологияны дамытуға күш жұмсалады.

Айта кетейік, ұлттық қауіпсіздікті нығайтуға арналған ғаламдық өзара іс-қимыл орталығы экс-президент Барак Обама билігі кезінде жүзеге асқан болатын. Алғашқы кезде аталған орталық «Ислам мемлекеті», «Мұсылман бауырлар» террорлық ұйымына қарсы құрылған. Қазіргі уақытта ақпарат саласын шетелдік «қоқыстан» тазарту мақсатында біршама іс атқару жоспарланған.

"The Qazaq Times"