Таулы Алтай облысындағы әйелдер. Фото; VIKTOR SADCHIKOV/TASS/BBC.

Ресей Федерациясына қарасты түркі халықтары мекен еткен өңірлер мен республикаларда алкоголизмге қарсы күрес жүргізілгеніне 30 жылдың жүзі болды. Соның нәтижесінде қазір Якутия, Алтай Республикасы, Татарстан, Тыва жерлерінде алкоголсыз аймақтар қалыптасқан. Ресей құрамындағы түркі халықтары жасаған өңірлердегі бұл жағдай BBC-дің назарын аударған.

 Еркектерді алкоголизмнен аман алып қалу үшін, арақ-шарапқа қарсы күресті алғаш рет Алтай Республикасының әйелдері көтерген. Мәліметтерге қарағанда, арақтан улап өлу әр 100 өлімнің 12-сін иелеген. Мұндай қырылудан сақтану үшін  жергілікті тұрғындар өзі аттанысқа келіп, аймақтарда алкоголды ішімдіктерді сатуға тыйым салған.

Чике-Таман асуы. Фото: KIRILL KUKHMAR/TASS/GETTY IMAGES/BBC.

Арақ-шараптан бас тарту қозғалысында РФ ішінде лидерлік орын Якутияда. Онда 182 аймақ алкоголды ішімдік сатудан бас тартқан. Ал, алкоголге қарсы тұрған Татарстанда 15, Тывада 6 аймақ бар. Алтай Республикасының Бочи және Кұлада жерлерінде 1985 жылдан бері қарай арақ-шарапқа шектеу қойылған. Бұл аймақ әлемде асқар тау, құзар шыңы, қияметтің қыл көпіріндей аса қиын жолдарымен туристерді өзіне баураған аймақ. Айталық, Чике-Таман асуы әлемдегі ең қиын 10 жолдың бірі болып саналады. Алайда, туристер бұл аймақтан алкоголды ішімдіктерді емге де іздеп таба алмайды.

Алтай халықтары. Фото: KIRILL KUKHMAR/TASS/GETTY IMAGES/BBC.

Таулы Алтайда «Ішімдіксіз Алтай» еріктілер ұйымы қазірге дейін алкоголизмге қарсы күресті табанды жалғастырып келеді.

“The Qazaq Times”